作者 : 余家旗 Alex，樓盤王及置業王創辦人，香港地產代理商總會副主席。
五二折的幸運兒
六合彩個個都想中，但係六合彩嘅彩池大家有冇諗過有幾多呢？勁嘅時候可能有幾千萬，普通嘅時候幾百萬都有。但其實抽中一間居屋都有機會可以慳到幾百萬蚊，雖然佢個機率好低，但係都總好過求中六合彩。
講個小故事比大家知，其實我細個陪過我爸爸去攞六合彩二獎，仲要同人分，中先得個唔過三十萬。因為六合彩可以有好多注中，但係間居屋最多都係你都同屋企人共享天倫之樂。呢啲都係作個簡單嘅比喻，其實我最想講嘅係無論係咩東西或工具，佢本身價值十蚊嘅嘢你可以用五嗰二買到，咁你個機會成本就有四個八。呢個機會成本係包括你本身嘅享受亦都給予你一個資本運用。由於門檻降低到五二折，小弟絕對有權相信居屋只會越來越多人申請，但係大家當然會問究竟有冇咁多地方去起咁多居屋去迎接咁龐大嘅需求呢？
小弟近期都被政府邀請出席土地專責小組的閉門及公開會議，感覺到政府係有決心解決房屋問題。我本來都想去睇吓究竟佢哋有乜嘢妙策良方，畀少少意見。經過兩場咨詢會之後，我發現佢哋嘅短中場政策設計得十分出色，可惜閉門會議嘅建設性遠比公開討論要高。公開討論見效低，原因就是大家有不滿都喺想件事好，但可能不擅於表達，擾亂到秩序令到情況十分尷尬。千祈唔好誤會我想表達任何政治立場。我只不過係想同大家呼籲下，如果真係想香港好，希望可以用個建設嘅角度做事。
獅子山下精神永垂不朽，大家只要做好自己崗位，依家冇將來就會有，好事必然來。政府的政策只是一個扶持，但若每個人嘅目標喺抽居屋同公屋，真喺社會嘅悲歌！我亦在此希望各位上進奮鬥嘅青年及家庭，日後可以買到各自的dream house，將居屋留比真正有需要嘅人。
