作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
做起大事上嚟 女人都係累事
個市反彈足足一千點之後就打回頭，執筆之時香港剛打完風，大市開市已最多跌接近500點，主要又係因為貿易戰不確定因素，我哋炒股、投資最怕就係不確定因素嘛！啲老前輩教落有懷疑就揸現金，就同筆者同事R君咁，本來飛咗去泰國玩五日，預定周日（即9月16日）才回港，因為打風關係周日一定無航班，而且周一二都唔肯定安排到機位，所以佢決定提早一日回港，因為咁做係最穩陣又唔需要請多日假。最近策略都係保守為主，有賺就要食，食完都唔係急住買貨。
筆者幾時都同意女人做嘢係比較細心，打風前特首林鄭月娥算做到嘢，安排政府唔同部門做應對措施，未落風球前已經安排好學生唔洗返學，有好多市民都表示讚好；不過做起大事上嚟大部分女人都係累事，話說天文台喺周一（9月17日）清晨六時前改發三號風球，搞到一眾市民要喺交通嚴重癱瘓下如常上班。唔怕得罪講句，女人喺重大事關頭時係無腦的，停工事少但停市事大吖嘛，可能佢權衡過「輕重」覺得貿然停市香港嘅經濟損失佢擔當唔起啦。老實講，返唔到公司，個市有咩突發事大部分都處理唔到啦，到時又擔唔擔當得起呢？依家仲要有塌樹死人嘅疑似個案！所以大家留意一下，金融呢行財演又好，撈證券傾刁又好，做指揮官絕大部分都係男人，點解？因為女人喺重大事情上都係累事吖嘛。咁又唔係歧視女性，做研究部、資料搜集類嘅工作女人都係比較出色，只要有咩重要嘢唔好比佢哋決定就得喇。
有機會炒鑊勁嘅半新股
今期推介股票係一隻半新股全達電器集團控股（01750），間公司上咗市唔係好耐，屬於半新股。集團為低壓配電及電力控制裝置製造商及供應商。以公司現價0.355元計市值約6.39億元，當時招股價係0.3元，上市後足足跌近一半一直插水至0.2元水平，係最近先上返水面多小小。老老實實，你係老散買咗都好難頂得順五成跌幅啦，加上個市氣氛又差，個個都一係就淆晒底，再唔係就沽晒啲貨食花生。依筆者睇嚟，呢隻嘢係乾度都幾夠的，加上睇盤路似有人喺呢個位密密收貨又唔多似係幻覺，只要個市氣氛稍為好番些少，相信佢係會好大機會炒鑊勁嘅。
【權益披露：本人沒持有上述股份】
Facebook專頁：財技戲法
