作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
當唔當底褲買 咁大個人自己決定
話說上周筆者講過華隆金控（01682），適逢刊出日期恒指大跌一千點，睇返佢個股價都唔係跌好多，試過震落0.68元但最後都能夠掃清沽盤倒升收市，足以證明背後人實力強勁。
呢個大跌浪就算九成幾乾嘅股票都一樣可以下跌差不多一半，有唔少朋友都問點解啲股票會跌咁多。其實一個較為深嘅調整浪又好或者係技術性熊市都好，跌得太急或者太深都會出現好多不合理的事情。講白啲，股票從來都係不合理，只不過係有心人去賦予不合理嘅股票一個較為合理嘅炒作理由，從而提高價值再將其合理化而已。往往事後總能夠畀到一個解釋，例如「莊家」唔出來頂，同時大跌市觸發唔少Margin Call；因為都有唔少人係揸藍籌去攞一個孖展額來炒細股，當跌市時大股價值少了同時按揭比率或者價值減少了，到時無錢補倉就只能夠沽細股，當市場沒有一個莊家去維持秩序嘅時候，股價就會隨之下跌到一個極不合理水平，到時有心人先出來食晒啲殘貨都唔遲。
買財技股 風險自控
就喺幾日前有一位唔知係網友定讀者啦，在筆者Facebook Page詢問利福中國（02136）的情況，佢係咁問的：請問2136幾時私有化？我跟你當埋條十年前嘅珍藏版比卡丘底褲來買。事緣筆者曾經寫過利福中國值博率很高，戲言當埋底牌都要買。首先撇除佢係搞事分子，「認真MODE」去睇呢件事，第一典當舖絕對係唔會受理所謂十年前絕牌比卡丘底褲作抵押，第二如果睇完篇分享自己唔衡量過風險就買，假設睇電視見到人吞刀片係唔係照吞？出咗咩事都唔係夠怪其他人，再者筆者分析純為分享，認為值博率高不代表立即會私有化，亦不是筆者控制範圍。如此無智商之人，筆者一見即封鎖絕不留手。
平心而論，大部分股票下跌幅度都很大，好多都起碼跌過四成以上，反觀利福中國以最近半年平均約3.3元水平計，都只係下跌最多兩成左右，更何況「細劉」同大家坐埋同一條船，已持股差不多接近上限75%，能唔能夠反映價值只係時間問題，如果買財技股連兩成幾波幅都頂唔順嘅，不如唔好買，返屋企「執書包」啦！
【權益披露：本人持有利福中國股份】
Facebook專頁：財技戲法
