作者：Sammy – 畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
質地唔錯的建築工程股
以前睇呢類財經專欄，心裡成日都會有一個問題想問，就係點解啲人推介完啲股票成日都申報無持有嘅呢？當筆者開始寫欄無幾耐，就深深明白到箇中道理係非常簡單，每個星期都推一隻心水股票，邊有咁多錢隻隻都持有呢？學「喜記辣蟹」老闆咁講：「哪有錢？」唔係話無持有嘅就唔好，就好似以下呢隻股票質地都非常之好，但筆者因為持有另外幾隻心頭好，所以都無辦法持有咁解囉。
呢隻就係萬景控股（02193），呢間公司主要做土木工程，其次就係以機電工程嘅獨立檢驗工程師身份提諮詢服務。大股東盧源昌最近一個月都在0.79元樓下有三次小增持，同時持貨72.53%，看中央結算及交收系統（CCASS）貨源亦相當集中。以現價0.8元市值3.36億元計，相距主板殼價已經有大幅折讓，公司現金有1.67億元，相對負債只有6,600萬元的日常業務欠款，財務狀況非常穩定。
細談意科供股大法
前一篇文都有講過下「肥仔頭巾財演」在「臉書」上面大叫沽清意科控股（00943）係幾咁低能白痴嘅事，筆者剛見到聯交所有新公告Update，就喺呢度寫多少少啦。事緣意科控股在2017年9月21日宣布一供四每股供0.055元，當時公司股價只有0.06元，屬於小折讓兼大比例供股。假設散戶持有100萬股約六萬元價值的股票，就必須額外拿出22萬元出來供股，以呢個情況嚟講，散戶多數都係無錢供又或者有錢都唔會去供。
問題來了，大家上公司披露權益睇其實當時公司無主要股東，但幕後人一定有橫手持貨，咁究竟係點先知橫手有幾多呢？呢度筆者就分享一個簡單方法，只要去對上一次EGM（股東特別大會）結果文件就會有蛛絲馬迹，當時公司已發行股份數目為1,442,799,400股，贊成供股股份投票數目為446,522,993股，筆者會假設呢個數字係幕後人同一陣線記低佢，咁贊成得就好多機會都係會跟供，如果呢度全數跟供即係會有1,786,091,932股；睇番個供股結果有35份申請合共1,537,663,236股接納供股，加上供股文件另一個重點就係，供股包銷商為公司執行董事梁松山，如果今次街外人無人供股的話，將446,522,993假設橫手股數加上1,537,663,236股接納供股再加上梁松山包銷的4,233,534,364供股股份，得出總數為6,217,720,593股，佔供股完成後已發行股數7,213,997,000股約86.18%，以上只係好粗略估計，街貨已被渣到超級乾。
就喺筆者執筆之日，公司宣布以6.62億元買一間馬來西亞公司35%股權，用2.38億元現金加餘下特別授權以每股0.27元配佔擴大股本17.87%，講到呢度由於篇幅所限下期再講啦。
Facebook 專頁：財技戲法
【權益披露：本人持有同得仕（集團）股份】
