作者 : Sammy—畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
有線寬頻第二次供股值博率高
上周在0.275元推介大家買信越控股（06038）後，股價已慢慢回升至0.31元，叫做起碼有10%水位，雖然筆者無買，但假設有讀者跟買了都係可喜之事。由於貿易戰開始明朗化，大市都相對有回暖迹象，筆者有朋友手持幾張期指都有唔錯斬鑊，短期趨勢好多人都係睇升，只不過26,600阻力都幾大，好可能都係大上大落CHOK到你暈格局；大家參考下好喇，始終自己不是期貨專家。
細價股方面，上周多隻暴跌股自然有人歡喜有人愁，有朋友接刀不幸中刀，有其他人接得住贏佢十幾廿個價位都非常Happy，但始終呢樣都係高危動作，輸唔起嘅讀者都係唔好試，尤其強烈唔建議用孖展額去接刀。以中國海景（01106）做例子，當日暴跌最多接近九成，假設有人懶醒諗住0.04元都叫做接近主板殼價去買，戶口有10萬元就買大一倍20萬貨，點知當日股價大插至最低0.02元，戶口倉位即時歸零，證券行強制斬倉乜仇都無得報啦，所以「接刀」最好都係用實錢，起碼跌起上嚟都叫做輸極有限。
有意包銷供股 憧憬值博率
講起輸極有限，筆者身邊有位股友P君推介一隻股票，經過一番討論都覺得值博率幾高下，呢隻就係有線寬頻（01097）。呢間嘢上年已經做過一次3供5易手，當時每股供股價係0.21元，早兩月前公司與中移動香港訂立諒解備忘錄（其實早半年前已收到好友阿活來的堅料，但可惜消息來得過早一直以為無料到），內容包括：中國移動香港向有線寬頻支付若干費用作為對方使用公司的網絡資源；中國移動香港委聘香港寬頻以為網絡 建設及維護提供專業意見及相關服務及向中國移動香港提供電視內容的代價；最後探索透過中國移動香港新建網絡及本集團網絡的未來商機，除此之外公司預期正式協議將為長達二十年。當時呢個news一出，股價由9仙幾兩日時間踢高至0.31元，只不過之後股價無以為繼，一直下跌。
今次控股股東有意包銷埋供股，假設無人供的話，控股股東即由原來持股43.2%增至71.6%，總算有一定值博率。不過唔急，因為下個月17日先正式除權買賣，下期會繼續再講。
【權益披露：本人沒持有上述股份】
Facebook專頁：財技戲法
