作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
年尾個個都等收爐
將近年尾好多行家都話差不多收爐，好多都話趁呢段休魚期去一去旅行，應該要到明年先有嘢搞。好似之前筆者講嗰啲IPO咁，就係因為年尾將至，有一隻到一個月期限都未交收到，好多「腦細」都周圍撲水，股價就升咗上去穿埋大氣層，但啲資金轉唔到身想接返啲貨百鳥歸巢都有一定難度，咁講好一個月搞掂依家話要坐多陣就梗係有啲「頭」會有微言啦，其實最後都係好簡單加少少茶錢就解決咗，等於你去問財務公司借錢，攤長啲還款時間就梗係要畀貴啲利息啦。不過依家隻嘢個股價依家堅離地球登咗月咁滯，要交收都一定好唔方便，試諗下啲大飛要拎返球幾現金出來都咪話唔煩，最完美就係打返個價落去，比起招股價高6至7%就「Perfec池」喇，到時沽咗要搬錢都容易好多。
大市方面，小弟都同啲朋友一齊玩下揸了幾張期貨，大家都係等緊呢個星期尾「支二十」睇下有無好消息，加上月底結算睇下26,800呢啲阻力位穿唔穿到，如果大穿可以睇高一線，當然要同時Set返穿咩位就要止賺啦。
有「風」吹 創仔股
至於細價股方面，我都無咩特別心水，大家都係等緊試試隻有線寬頻（01097），但因為有排都未除權所以都係得個睇字。喺一眾好友擘大個口得個窿嘅同時，有朋友來料話佢會買一隻創仔股票，好有求知慾嘅我哋當然一齊問佢點解啦，佢就答我哋係「風」；呢啲咁嘅時世幾耐無聽過有「風」吹，一定係堅料啦，加上呢個朋友畀親嘅「風」都係堅到無朋友，係我哋衰仔好多時無理到走咗N次寶揼咗次之春咁解，呢隻就係捷利交易寶（08017），呢間公司9月28日上市，當時招股價為0.64元，公司係領先一體化證券交易平台服務供應商之 一，主要服務於香港券商及其客戶，公司在香港的券商客戶均為B類及C類交易所參與者 ，其一體化證券交易平台服務主要包括前台交易系統服務、行情數據服務及增值服務。（老實講筆者用過都算幾好用）當時朋友話「風」到時，股價4毫幾，依家都只不過係6毫子左右，計市值剛好只有3億元，如果計創仔殼價加埋佢有接近8千萬元現金就有一定保證先，筆者相信年尾收爐前要搵水唔會咁快炒完嘅，大家有興趣就小注玩下囉。
【權益披露：本人沒持有上述股份】
Facebook專頁：財技戲法
