作者 : Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
話係莊家親自畀嘅料 我一個標點符號都唔會信
下筆之時G20峰會已過，中美「習大大」同「侵侵」兩國元首達成共識同意貿易戰停火90日，上周筆者都有分享大市走勢多數向好，只要升穿26,800呢啲阻力位就可以睇高一線，好大機會見27,000點企穩直上，有跟揸番一兩張期指嘅讀者應該可以過一個開心聖誕節喇。
個市有回暖迹象，啲爛賭鬼就一定第一時間衝出來問有咩好買？其實大市升唔代表你啲股仔都一定會跟升，就好似筆者一直有推介嘅利福中國（02136）咁，大股東一股都無沽過，加上個市升幾多佢都可以跌，問題係佢股權夠集中，即係一切都Under Control。當然買完即升就皆大歡喜啦；如果買佢係搏私有化食大茶飯嘅話，至少時間成本都係要付出嘅，如果等唔到就走先，到時走咗先爆升就後悔都無人會可憐，只會Send個「so9sad」畀你。
理智啲炒股 勿人雲亦雲
話說就喺上周五（11月30日），有朋友D君收市後發咗個訊息畀筆者，內容都係問隻STERLING GP（01825）點睇、買唔買得過之類，另外附加多句「呢隻嘢係我個客畀我嘅，佢話佢係幫呢間公司操盤做莊。」當日大跌至0.6元附近，又抽上1.3元時個客叫我買我唔敢呀。好在呢位朋友都有啲智商，如果唔係應該「奶大鑊」。首先，通常我會做有少少過濾，呢個消息來源來自邊個，嗰啲話自己做莊一聽就知有問題，佢既然將個價打得落去0.6元又咁好心送錢畀你洗，點解要將個價托返上1.3元先叫你買呢，成個鄭子誠咁款眼甘甘咁望住你，講唔係有陰謀想搵你笨係乜？仲有就係如果佢係莊，有得老闆錢將隻嘢踢上去又點會叫你去偷自己嘅貨呢？不如直接送錢畀你仲方便，所以自認係莊話畀料明益我，我連佢一個標點符號都唔會信。另一個角度，就咁睇佢上周五收市價1.3元，計都差唔多成10億元市值，間公司做服裝嘅，10月19日以0.4元招股價上市無耐，中期業績半年做3億幾元生意先賺得嗰3百多萬元已經係生意極度難做，仲要公司淨資產先得嗰7,000多萬元，計埋主板殼價都只係值一半價錢，真係你買埋我嗰份喇！
依家呢類新股仲要預計埋佢啲人頭交收，交收期約一個月左右，就計大飛交收先唔預怕佢走佬，每個「頭」都要抬返約「兩球」現金出來喎，大拿拿兩球現金通街走咩？點計都係炸返落去。
【權益披露：本人持有利福中國股份】
Facebook 專頁：財技戲法
