作者 : Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
2019年細價股𥄫邊隻
日本地址冷知識
2018年最後一期同大家介紹過「煮飯仙人」村嶋孟的餐廳「銀飯屋下戶亭」，筆者忘了附上地址，是位於大阪府堺市堺區新在家町西1-1-30，如果找不到的話在地圖輸入電話號碼：+81 72-238-0934就會找到，好多時大家睇日本旅遊書都唔明白地址後面嗰串數字係乜，其實同我哋啲中文地址差唔多，都係分區、街道、號數之類，例如縣名，之後就係區，再之後就係嗰串數字：町名同幾町目，之後就係街號數，最後先係幾多號屋，唔熟嘅人都係唔好懶醒去睇號碼喇，因為日本好多地方都唔係跟順序的，7號屋之後嗰間可以係3號屋，始終跟Google Map行最穩陣實際。
期指方面，上周五（1月4日）低位反彈延續夜期爆升差不多1,100點，一周極速「殺兩邊」都搞到好多人頂唔順，所以有位就要食唔可以貪心，筆者偏向短期頂已到可以回落返些少都唔過分，始終呢幾日好消息盡出咁滯，點都要抖一抖嘅。
細價股無方向
早排推介的華隆金控（01682）打過上1.19元之後慢慢回落返到1.11元，呢個月以來都係浮上浮落無太大方向，唯一係知佢有人睇場，所以大家都係放心可以擺埋一邊就算，始終無論隻股票幾乾都好，要做起嘢上來無水都係唔得，正所謂你搵人睇場但只係畀咗睇場費，無理由要人幫你打埋個價上去吧？咁即係買條蔥要人送隻雞，咁搵笨嘅嘢傻嘅先會做。亦因為大市氣氛唔太好，啲股乾踢上去都係無用，任你踢到個價飛離銀河系都好，無魚接都係嘥氣。另外有一隻防守力唔錯嘅股票中國新華教育（02779）大家都可以留意一下，間公司係長三角最大民辦高等教育集團，提供優質的教育，包括高等學歷教育及職業教育，涵蓋應用型教育的多個領域，早排內地最新政策規定上市公司不得投資營利性幼兒園，呢樣其實對佢業務上無太大影響，依家公司現市值29.6億元，淨計現金、現金等價物同埋按公平值計入損益加嘅金融資產就係差唔多16億元人民幣，計埋淨資產減無形資產都20億元人民幣，差不多22.8億港元，加上大股東叫做有少少增持，現價1.84元相對上年3月18日上市招股價3.26元有一定吸引力。
日前同個大哥飲茶先知某間行嘅一位大佬上年2018年接了30幾隻股票返來幫手睇場打價，講真有30幾隻做真係成年都唔洗出去搵客了。
【權益披露：本人持有華隆金控股份】
