作者 : Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
康利國際乾身值博
之前講過好多行家除咗本業之外，都會「撈多幾瓣」，有啲自己會搞生意，有啲就會介紹啲老闆幫佢哋去某啲地方搞生意。就好似最近見一位大哥咁，佢「其中一瓣」就係幫啲老闆去柬埔寨搞金融、保險牌照，搞得呢樣一定要搞埋地產，都仲計未營運啲老闆閒閒地都要拎數百萬美金出來，所以拆佣都相當可觀，不過嗰邊主要城市已經發展得七七八八接近飽和狀態，所以政府開始規劃一個新地方來大搞商業、旅遊發展，呢位大哥梗係把握機會啦，話晒有錢搵一定有人爭，佢識嘅人入面已經有三個係做緊同樣嘅嘢，所以都係搵食艱難。
個market一直都唔係幾夠水，所以個市大升都唔係好多股票有炒作，市場好多人自自然然就會寄望番新股，始終新屎坑三日香。優品360（02360）上市，招股價1元高開1.24元後曾經低見1.08元，到今日大升至最高1.89元，比起招股價升近一倍，筆者估計第一天收返啲「頭」嘅飛，就直接掃埋條街啲貨一直打上去，當然後續可以打上2元以上都唔係奇怪之事，不過風險相對地就只會越來越高，如果招股期間無抽到嘅朋友，筆者都唔建議去高追喇。
𥄫到隻潛升股
反而有啲上市無耐嘅半新股，有興趣嘅朋友可以留意一下，今期筆者好友P君就彈咗一個冧巴過來康利國際控股（06890），呢個朋友可以用精甩尾去形容，唔係堅有值博率嘅佢眼尾都唔會望一望的。呢間公司資料話集團主要產銷（一）非彩塗鍍鋅產品，供中游鋼產品加工商（彼等大部分並無能力進行熱鍍鋅）進一步加工成板狀非彩塗鍍鋅產品及彩塗鍍鋅產品以主要向家電製造商轉售；（二）冷軋鋼產品，供家電製造商生產冰箱、洗衣機和烤箱等家電。行業嚟講始終做加工呢一Part唔會無得做，雖然有錢賺但亦唔算係非常吸引。最吸引嘅係佢今次上市搵咗廣發融資做保薦人，廣發證券、山證國際做聯席帳簿管理人同埋牽頭經辦人，一睇之下隻嘢上市兩個月無大炒之餘，仲要CCASS入面靚靚仔仔，頭五間行入面已經有兩間係聯席帳簿管理人同埋牽頭經辦人，其餘幾間都唔係散戶常用證券行；如果只計及Non CCASS加上頭五大持貨行高達97.22%，喺咁CORNER嘅情況下現價只有1元仲低於招股價1.02元，都算非常值博。
【權益披露：本人沒持有上述股份】
Facebook專頁：財技戲法
