作者：Sammy畢業於英國赫德斯菲爾德大學工商管理學系。曾任職業魔術師及婚禮司儀，現以財技角度切入分析股票，破解莊家的障眼法。
跟進兩隻愛股
上期講到隻意科控股（00943）供乾晒成手貨，之後出咗份公告話收購馬來西亞一間公司35%股權，用供股得返來嗰三億元現金入面二億幾元同埋發新股每股0.27元支付，筆者同股友「柏神」討論過，認為此股開始散水，呢個星期股價即刻走晒樣。首先話就話對方係獨立第三方，但都唔知佢會唔會私底下同大股東有協議幫手散貨，話晒佢供返來手貨都只不過係0.055元，就算炸落去0.11元都大把肉食；第二就係依家買嗰間公司資產都唔係算好值錢，嗰塊地都唔係喺最旺地區，有極大可能係垃圾資產，第三就係根據以往經驗，通常出溢價配股都無好下場。提起「柏神」，呢條友都係一個奇人，唔使返工做嘢靠「炒嘢」為生，我地圍來班股友有「供股」問題一定第一個搵佢拆解，因為一來懶得睇，二來佢真係堅勁。
筆者半年之前有一篇寫「一大一細，一啲都唔貴（二）」講中國金茂（00817），記得當時股價仲係3.55元左右，仲要之前有管理層在2.5元至2.6元增持，所以先推介俾大家，執筆時收市價為5.3元 ，半年有49%升幅都算叫做唔錯喇，有貨嘅可以先沽三分一，其他繼續Keep住。騰出來嘅資金不妨考慮呢啲位加注三盛控股（02183），三盛由歷史高位10.6元跌落黎9.2元開始見到東興證券在「左手邊」擺買盤去頂，對上一次三盛由8元下跌至6.2元時，東興證券都有在「左手邊」出買盤頂實，同埋3月就係三盛控股業績期，之前都預計過佢會發盈喜同埋會更進一步公布多啲合營公司收地資料，加上早排發債得到10.5億元現金都未有動作用到，所以筆者覺得現價水平已經差唔多可以加注，等待再一波大升浪。
另一隻要再度提醒大家嘅都係筆者愛股華誼騰訊娛樂（00419），如果有追開「財技戲法」呢個Facebook專頁或者有睇開我在《炒股幫》星期一嘅直播節目，相信都唔會陌生，早喺上年10月3日，筆者就喺專頁通知大家，華誼騰訊娛樂有大手射倉，差唔多1.26億股由金利豐證券（01031）射去環球大通證券，事隔僅僅兩天，股價由0.35元大炒至0.63元；就喺1月12日又有大手射倉1.17億股由信達國際證券射去環球大通證券，呢手貨喺之後兩日射咗去中銀，事隔不到一個星期，中銀又有1.86億股射返去環球大通，點解會多咗7,000萬股呢，睇番中央結算及交收系統（CCASS）紀錄，原來上年11月8日，信達都有7,000萬股射去環球大通，事隔兩個交易日即係11月13日，呢7,000萬股由環球大通射返去中銀，所以以上都係同一個Account。
順帶一提，咁究竟信達國際啲貨係邊度源頭嘅呢，經過筆者不斷翻查，之前信達嘅貨就係2015年6月1日雲鋒證券射過去的，當時好似叫瑞東環球金融（00376，現名：雲鋒金融）咁上下吧，而當日正正就係華誼騰訊娛樂停牌嗰日，當日仲係叫「中國9號健康」，嗰陣停牌後就係出公告話發新股俾兩個主要股東，其中一個牽頭投資者母公司為上市公司，當然事後睇番就係賣俾華誼兄弟同埋騰訊啦，筆者估計環球大通呢手大貨，應該係前殼主高生所控制的，至於依家環球大通呢手大貨提咗實物股票，極有可能一係就鎖喺夾萬，一係就做Bought Sold Note（股份轉讓）喇。
Facebook 專頁：財技戲法
【權益披露：本人持有三盛控股、華誼騰訊娛樂股份】
