作者：Ivan Leung -「MoneyKOL」是一個專業的網上財經平台，匯集多位來至不同領域和背景的財經界KOL（Key Opinion Leader），致力為讀者提供更貼市的財經資訊，好讓讀者找到更適合和更好的機遇。
財商教育 分散風險 發掘退路
所有人都講分散風險，唔通個個都想，又個個都識分散風險咩？究竟係分散投資方式導致風險降低，定係在唔同時間買唔同類型唔同嘢來對沖風險，定係咩高風險嘢都唔做，索性完全迴避風險呢？
前個禮拜，有機會Sit咗堂朋友搞嘅財務教育班，同其他同學、朋友交流，個個都話理財睇落好簡單，講吓正現金流、資產管理，處理好啲負現金流、負債，玩吓Cashflow Game講吓Case Study，咁個個都成為理財大師，好似好簡單咁。
突然之間，講到東西方社會分別，幾時需要Disclose、起疑，都係學問。例如，有種叫「Honor System」，你會一直相信，直至發現被騙；另一種叫「懷疑主義」，你會一直Confront，直至找到確鑿證據證明真確無誤。咁Cryptocurrency呢？你會抱住咩心態睇呢樣嘢？有同學話唔識睇，所以無買；唔買唔賺，最重要嘅係起碼唔會輸。有啲同學直頭話係騙局，仲衰過仙股，無公司無業務Support，又無咩實際應用地方（起碼香港地Merchant肯收Cryptocurrency做交易貨幣根本唔多），遲早爆破咁話。其實，只要有Dream，一齊炒起一隻嘢，有幾難？市場話有價值就係有價值，就算無證據都好，只要有人機關算盡你都一樣會死無全屍。因為，自己獨自輸錢，係慘過全世界都Win而只有你一個做Outsider無參與過、無賺過。所以，有幣勝無幣，無幣就好心煩啦依家。所以，如果有幸畀個有經驗嘅ICO莊家呃咗你入局，就睇吓你用咩角度分析啦，入局出局都好，有錢搵就得。
同學講完ICO呢啲Trendy深嘢，就講返啲淺嘢，就係股票嘞。市場上，有一種股票叫「雨潤」、「南戈壁」，你以為賣肉賣食品賣必須品實無死啦，你以為做煤做能源發電實無死啦，點知，人算不如天算，死得超級甘。另一種叫「騰訊」、「吉利」，你以為係Bubble賣Game賣Data賣電動車都唔係咩必須品，仲要同傳統嘢分別好大，邊有可能咁耐持久力呀？仲唔Popped？錯晒呀！就係升到你唔信！無買中呢類股，全輸！買得少，都輸！買中前者類無買後者類，慘到無輪。而慘中之慘嘅係，買咗後者類嘅Put輪……最後，大家都認定，High Risk嘅Cryptocurrency只可以炒，唔建議放入個Portfolio度。保險、國債、公司債、外幣為首選類；股票、物業係次類；其他嘅都係第三類。保本，係緊要過賺錢。
前幾日，入咗醫院做咗個小手術，切咗生係右手上面嘅一粒嘢。出院後，包住咗隻右手大半，完全發唔到力，於是，唯有用左手去做番晒平日用右手做嘅工作，先發覺，原來自己根本平時好少訓練左手，一唔用隻主力手，起居飲食、刷牙、抹身、梳頭、開大、用筷子……全部都唔太順。又諗起，平時打籃球，只得右手唔識用左手，死去一邊好易畀人睇死。就好似投資，只信死一種方法一種投資產品，無其他替代方案無退路，一High嘢就死得好慘嘞。所以由依家開始，一定要用多啲左手，學多啲Cryptocurrency，除咗自己擅長、慣性嘅嘢之外，一定要學啲自己唔擅長嘅嘢，打好底，人一定要有退路，因為，當需要改變嘅時候，有無替代計劃，好鬼緊要。
你能夠成功分散風險，就係代表，你愈有搵出有效方法解決問題的能力。（Ivan Leung）
