作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
足球單欖之進化版
記得筆者上年同大家分享過馬會足球投注入球單雙的賭欖方程式，而最近幾日好兄弟藝高人膽大做了新嘗試，筆者認為呢個係單雙欖的進化版而且難度好高，屬於高風險高回報類別，因為佢只投注半場入球大細的1.5球中位數大，買得半場入球1.5大即半場45分鐘要入夠2球才算有錢收，而半場入球大賠率多數都有2至3倍以上，間中有4倍賠率出現，所以「連輸幾口唔緊要，只要中返一口就可救全家」。筆者本身研究單雙欖最主要係因為入球單雙可以計數，因為結果只有單或者雙，係絕對唔會出現第三個結果，所以個Probability係一半，連輸7次就係0.78125%，即係有99.21875%係會贏。我質疑佢半大欖的可行性係因為半場入球大嘅Probability肯定唔會係一半，本身半場要入兩球已經係非常困難，但佢最近一連六日的紀錄由第一口10元開始買，只買到第七口總本金10,930元利潤已累計有23,178.6元，已經翻本有餘，之後再推落去根本毫無壓力，至於係咪真係可行，就要等大家有膽去試試喇。
慕容控股有古怪
臨近農曆新年筆者最近都係忙於應酬食飯，都無乜多餘時間去篩選股票，所以今次都係朋友P君畀嘅號碼慕容控股（01575）。呢間公司2017年1月12日上市，主要業務為生產及銷售沙發、沙發套及其他家具產品。首先以股權分布去睇，本身大股東慕容資本有限公司持股75%，公眾股東25%入面已經有9.01%由睿思資本有限公司持有，其他公眾股東牌面只得15.99%；上年1月公司更與國際金融公司訂立長達五年的2億元可換股協議，年利率只有1.25%及轉換價為2.22元簡直平到無朋友，假設獲悉數轉換計將發行最多90,090,090股，公眾股東再被攤薄至14.67%。公司於半年後以35百萬美元收購大股東在美國東部從事完整系列家具產品及家居飾品的零售業務，目標公司在美國東部經營17個零售點，由於係上市無耐又一直無大炒過，今次唔認為佢係偷錢，暫且睇佢係注入業務吧。因為筆者發現有一個非常奇怪的現象，儘管股價曾一度踢上過2.21元，但CCASS看來非沒有散貨，頭兩間券商持股已達89.41%，以呢一年跌勢根本唔會有人頂得順，假設貨集中在強者手上，隨時有爆上倍升可能。
【權益披露：本人沒持有上述股份】
