作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
𥄫實國美零售 預定位袋錢
新年過後大市氣氛好了幾倍不止，啲IPO又有得開始做，行家們叫做齊齊開工搵多啲，另外有多隻細股都蠢蠢欲動（其實已經動了不少），所以都係睇返啲之前推介過又不斷沉底嘅股份。
之前重點推介的華誼騰訊娛樂（00419），呢隻嘢本身質地係好，但一波三折賣殼又勒住，之前騰訊（00700）想放隻手游落去又搞唔掂，新年前啲幕後人士都係諗緊計仔，見剛剛幾日大成交踢返上去0.249元都可能有新動作都唔定，筆者都係等佢上穿之前個阻力位0.255元睇下有無動力先再算。
另外，仲有啲等食大茶飯嘅靜咗好耐又唔太想沽佢有利福中國（02136）同埋華隆金控（01682），前者始終大股東都係持74.91%無限接近上限的75%，唯獨大股東唔急，加上上年市況太差，筆者相信死跟到尾必定有好果子吃的；至於後者屬於乾到龜裂嘅股票，筆者一直認為有大炒可能，嚟緊公司仲會改名㖭！有朋友話吳生上岸搵夠未必會大炒，其實我哋炒細股好多時背後老闆往績強勁，令人期待往後作品都係賣點之一，但會唔會因為之前成績輝煌而搵夠收山唔炒就見仁見智喇。
復出之作
因為有消息指近日北京國美電器有限公司的法定代表人發生變更，黃光裕的母親曾嬋貞退出，認為呢個動作或者係同國美電器創始人黃光裕出獄提前嘅布局。消息一出，成系內股票大炒，分別有國美零售（00493）、國美金融科技（00628）及歡喜傳媒（08172）。三隻股票入面，筆者首選國美零售，公司除電子、電器用品銷售，沾手電商平台，現市值只有約170億元，以黃光裕實力加上十年磨一劍，淨係話題性已經夠用來大炒特炒啦。副選就係國美金融科技，前身華銀控股，同歡喜傳媒一樣由高振順穿針引線以每股0.77元配售20.66億股畀黃光裕老婆仔杜鵑、高振順同埋余楠，當時佔擴大股本76.5%，佢哋持股分別為61.2%、10.2%及5.1%，呢隻股票勝在未大炒過，而且對於黃老闆嚟講又係細細隻易於操作，現價0.69元仲要比佢哋全購價低10%以上，以高生無寶不落嘅往績，吸引度大增。如果兩隻都要買筆者建議前者比較大注，始終成交量大要走都走得快啲，加上國美零售係黃生嘅旗艦，真係諗唔到輸得去邊。
【權益披露：本人持有華誼騰訊娛樂及利福中國股份】
Facebook專頁：財技戲法
