作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
C君的故事教訓
記得上年8月23日筆者講過叫大家認住一隻影視股要避一避，呢隻邵氏兄弟控股（00953）當日收市價為0.405元，2019年2月25日（周一）收市價0.210元，差不多跌去市值的一半，筆者預期佢仲會再跌落去。原因係某經紀行的某經紀C君佢買到一褲都係，重點係當時手持20球貨，成本價係由一蚊開始買落嚟，呢位人兄C君係一個奇人，佢做咗十幾年經紀，係完全唔識炒嘢；但係佢勝在把口得，氹得掂啲客陪佢癲，點癲法？佢會同客講1元買進10萬股嘅股票，假設跌到0.9元全數沽出都唔緊要，只要0.8元買回10萬股，咁就還原返個倉同時又賺咗一萬元差價喇！心水清的人會知道其實賺唔賺錢最緊要係睇個倉嘅Balance，話之你炒咗一千轉或者一萬轉又「還原幾多次個倉」都好，最後比之前少咗錢就係輸，多咗就係贏。可能做壞人先可以發達，C君曾經同我講：「客嘅嘢一雞死一雞鳴，最多都係搵過另一個客啫。佢輸佣金畀你好過輸出市場吖，佢唔輸畀你都係益咗其他人，你依家係幫緊佢。」問心呢啲說話我真係講唔出，同埋小朋友都知係警訊入面啲奸角先會講。
大佬要來跟 老闆就要來棟
其實高峰期C君有幾個太古城物業及一個中半山單位，加埋啲現金都有半億以上身家，作為一個唔識炒嘢嘅經紀算係撈得好成功，但近年C君不斷變賣物業，手頭上只剩番一個自住嘅太古城單位，除咗一個有幾百萬但買到爆晒孖展嘅股票戶口之外，仲有一筆差不多一千萬元嘅負債，七除八扣後都係得番一千萬左右。點解無啦啦會有千萬負債呢，俗語有云：大佬要來跟，老闆就要來棟嘅。有日一個大陸有錢佬W君帶佢去賭場賭錢，賭完錢送咗一隻價值幾十萬嘅名錶畀佢，又送咗一百萬畀佢任炒佣，同時佢話間接借千幾萬畀呢個老細，話呢個老細只係一時周轉唔來，將來一定唔止畀返千幾萬佢咁話喎。咪住！借千幾萬前送假幾十萬嘅錶畀你，仲要有一百萬醒你任你炒？ 估唔到C君真係信咗，當然到依家都係收唔返條數啦。
邵氏兄弟控股嘅情況就係雖然市值細，但大股東持貨少，而C君手上以超高孖展成數持貨約30球入埋CCASS十大，加上左邊無棚，都係C君零星擺買牌去頂，右邊有心人用結好證券牌不斷沽爆佢，C君繼續接貨。結局會係點？唔洗講都知啦！
今期心水大家可以盲買內地券商股。
【權益披露：本人沒持有上述股份】
Facebook專頁：財技戲法
