作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
香港券商水頭緊
華隆金控（01682）比起之前足足跌成20%以上，不過成交又不算太大，所以筆者都係靜觀其變，加上本周五開EGM通過公司改名「杭品生活科技股份有限公司」，相信都係改名大升前一大嚇。好多質地本身唔錯嘅股票都由地獄深淵最低位升返上來唔少，例如圓通速遞（06123），筆者上年都有發文講過係一隻股權超級集中，新老闆又有實力兼有基金揸貨，連舊老闆留一手貨唔賣，令市場憧憬佢將來必定大有一番作為，結果上年隨大市下跌到2元水平先開始反彈，今日仲差啲上返個全購價𠻹。
最近筆者老闆公司做了幾單大Project，所以放錢比較緊，就好似有朋友介紹個6字頭的主板上市公司客想借錢都係借唔到，本身個客要Target係想按幾億錢嘅貨來借億幾錢，間公司做手遊蝕錢中，「豬太」、「光仔」、「受仔」都做唔到。其實做唔到嘅原因，一係券商手頭緊無錢，一係就係個客嫌貴。咁唯有幫佢搵Stock Loan Fund啦，點知個客都係嫌貴，傾開先知出面啲Hedge Fund可以開到2厘幾至3厘，只不過係要按晒成手貨。唔怪得之前咁多出事Case，講真咁低息係真心吸引嘅，但點都係唔多穩陣㗎喇！原來個客本身借開10厘，但條數就快到期所以先四圍出去撲水，就係周圍公價做12隻（即12%）加1至2%Handling by Cash，只係比佢前多2厘啫，無辦法貴少少都要借㗎啦，都唔明啲大陸佬諗乜。點解Handling要比現金？主要因為畀兩邊簽好文件時中間人可以即時分錢，借一億就準備200萬現金、億半就300萬，如此類推。
兩新一舊
今期心水推介已經截飛同埋好多人抽嘅新股豚王母企賞之味（08096）同埋豆盟科技（01917），前者上年已經打算上市，2018年頭五個月蝕300萬，話就話因為上市開支要成900萬所以蝕錢，生意難做就真，因為筆者有做開飲食嘅朋友都話好難做，不過搏一搏頭嗰幾日短炒係絕對無問題，但博轉板就無謂喇，始終有排等。至於後者筆者聽聞佢哋自己圍晒飛，乜都漏唔到出街，淨係呢點幻想已經夠晒SEXY，筆者仲拎到佢幾靚嘅本皮製紅色記事簿𠻹。
仲有一隻相信好多人都遺忘咗，筆者都賣咗佢好耐嘅舊愛三盛控股（02183），東興證券已經行使咗部分嗰批可轉換優先股變咗普通股喇，加上之前母企注入去嘅優質項目應該好快反映喺嚟緊份業績度，隨時好似隻圓通咁爆幾棍上去都唔定。
【權益披露：本人沒持有上述股份】
Facebook 專頁：財技戲法
