作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
細讀上市公告有用
上個月中時筆者推介過恒達集團控股（03616），睇個勢又行得唔錯咁喎，由0.9元爬下爬下上到0.99元收市，推介前一直都有留意中州證券不斷密密收貨，假以時日由呢啲位踢返上招股價1.24元就真係「餓依斯」喇！（普遍香港人講日文嘅「好味」多數淨係識用おいしい（o i si i），但其實係For女仔用多，男人多數用うまい（u ma i））。
有朋友問我：「乜隻華隆金控（01682）明明過咗EGM股東特別大會，點解仲未改名呢？」其實之前有好多間公司要改名時都有好多人問，幾時改名其實就要參考返對上一份建議更改公司名稱嘅公告，通常都有個改公司名稱嘅條件，今次就係有兩個。其包括股東喺股東特別大會上通過有關更改公司名稱嘅特別決議案，同埋要百慕達公司註冊處處長批准後先可以改名，所以個決議案通過咗都未改到就係咁解喇，所以細讀上市公告係一定有用處，因為睇少兩行字就有機會錯過咗某啲重要資訊。
唔好以為殼股市場靜到好似死晒咁滯，筆者最近接觸過一隻剛剛主板上市無耐嘅新股，暗盤高開一兩成左右，上市升完一浸就開始潛水，話打落去收下街貨先，再過多排先收埋啲「人頭貨」，筆者再八多兩句原來係傾緊賣，一上到市就當係「期殼」咁賣，除咗呢隻之外，原來仲傾緊第二隻就嚟上而未上市嘅都會賣，雖然殼貨跌咗唔少，但仍然都係仲有市場。佢哋會一早傾好點樣砌飛、大概上市後點行、每月市值管理幫手維持跌序等等，誇張啲就等如個仔都未生出來就搵定未來新抱仔先咁上下啦。
中國新華教育未升完
近期上得比較穩定都係要數今年初同大家介紹的中國新華教育（02779），自從筆者留意到出咗份控股股東增持股權之後，雖然話多又唔算好多，只係1.74元增持咗0.1%，但話晒大股東都係持71.5%，起碼都係睇好將來股價先做呢個動作啦，原理就好似筆者一年有多前講過隻中國金茂（00817）咁，當時有管理層在2.5至2.6元增持，結果之後一年股價踢上至最高5.6元。依家隻中國新華教育一口氣由1.8X元踢上來2.84元呢個位，又唔覺有大成交派貨迹象喎，仲未到招股價3.26元，睇來仲有大把上望空間。
【權益披露：本人沒持有上述股份】
