作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
隱世滷水至尊
話說筆者不時都會周圍搵好嘢食同埋順便推介畀朋友，就好似老闆開嘅沾麵店都係日本攞個品牌來香港做，做咗幾年成為米芝蓮餐廳，都真係有實力先得，個個朋友都讚不絕口。另筆者今次要介紹一間有實力嘅潮州滷水飯店——蒙師傅滷水飯店，間舖就位於佐敦道上海街交界，只係得蒙師傅同埋佢老婆兩人經營。在店外睇，金漆字黑底大招牌下一個大玻璃廚房，滷水食物每日都整齊有序咁排好，一啲都唔馬虎。點解要強烈推介呢間店呢？筆者去過好多唔同嘅潮州打冷餐館食飯，旺角九記、上環尚興、西環明記，就連深水埗德豐都唔放過，唯獨係蒙師傅嘅鵝片、各色各樣嘅滷味能夠成功俘虜筆者條脷同個胃，先唔好講其他店價錢相對貴，食物質素先係靈魂所在，其他店水準保持唔到，時得時唔得，就以鵝片做例子，啲肉都係好乾巴巴；但蒙師傅佢滷味簡直係人間美味，就早兩日筆者買了200元鵝片鵝腎拼墨魚，由佐敦買上荔枝角個客度送酒，等咗三個鐘我另一位兄弟才來到，啲鵝片肉質都仲係好Juicy好腍！最緊要係價錢公道實惠，呢啲良心小店喺香港已經買少見少，聽講仲話最近畀業主加佢每個月一萬蚊租㖭，大家真係要多啲去支持下。另外，紅磡有一間蒙麵都係蒙師傅公子經營，可以一試。
雄岸科技有資金流入
市場氣氛好咗，兩市成交金額繼續破萬億，依家多番人出來傾刁，又有啲兄弟傾緊G.O.（全購），加上大陸錢鬆番少少，始終對個市場都係有正面影響嘅。有時筆者會推介啲「靜局股」，即係買完要擺埋一邊等佢做嘢踢上，但有時都會順住個勢，因為有資金流入嘅股票一樣可以大炒特炒。今日要同大家推介嘅係雄岸科技（01647），呢間公司2017年3月20日上市，之前已經易手（當年要約價0.87元），最吸引筆者主意係最近大股東Morgan Hill Holdings Limited本身持有公司51.49%，分別由Great Scenery Ventures Limited擁有51%及Emperor Grand International Limited擁有49%。姚先生為Great Scenery之唯一最終實益擁有人兼董事，而朱廣平先生為Emperor Grand之唯一最終實益擁有人兼董事，最近有個股權變動，只係公眾股東不變，新加入嘅聯席主席兼執行董事各大股東Morgan Hill Holdings Limited買入約19.38%。翻查資料朱廣平在新確科技（01063）嘅披露權益見過佢個名，記得2015年大炒到200億元市值，剛剛大炒一棍20%上去係因為在黑龍江撫遠市嘅附屬公司「撫遠龍麻」獲批開展工業大麻業務。剛剛股權變動就即刻有動作，加上又有資金流入炒作，筆者相信唔只咁簡單。
【權益披露：本人沒持有上述股份】
Facebook 專頁：財技戲法
