作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
華騰有望食住《Avengers 4》個勢
上周大部分細價股都有小炒迹象，就連跌到落地獄谷底、筆者同一眾友好持有嘅華誼騰訊娛樂（00419）都由0.2元邊上扯至最高0.27元，最重要係有成交配合。有傳華誼老闆落咗來香港，其實唔洗出面啲人傳，筆者證實係真有其事，話說3月28日老闆約埋我哋啲兄弟Happy Hour，最後老闆遲咗少少先來到，原來華誼大佬王中軍落咗來香港，於是老闆去Grand Hyatt同佢見面之後返來塞車先晏咗。其實大陸華誼買咗華誼騰訊娛樂呢隻殼之後大大話話都已經三年，本身係諗住騰訊做大華誼做細，騰訊注入一隻賺錢嘅遊戲落去華誼騰訊娛樂度，咁就可以踢到個價老蓮咁遠。（成日啲人話老蓮（音：鍊）咁遠老蓮咁大，究竟係有幾大有幾遠呢？原因係老蓮係老蓮子，用水煮過就會發到超大粒，於是啲人用來形容啲嘢好大好遠咁解）
華騰又有新搞作
筆者當然希望佢襯依家個市旺返少少推返個大Project出來啦，筆者記得之前曾經講過其中一個可能性就係將大陸華誼同羅素兄弟（拍復仇者聯盟3、4集的導演）在美國的合資的公司Brothers International,LLC的少量股權注入華誼騰訊娛樂，因為2016年8月29日年成立該公司時已在公告指明WR Brothers Inc可以經Oakton Circle LLC同意下轉讓股份予華誼騰訊娛樂及云鋒基金。Brothers International,LLC就是由華誼在美國的子公司WR Brothers Inc和羅素兄弟在美國的公司Oakton Circle LLC組成。
華誼騰訊娛樂在上周開始踢上，筆者懷疑有Spring River Duck（春江鴨）掃起，或者係個莊將個價踢返高啲唔想人低位買貨都唔定，加上股價踢起的同時，大陸華誼兄弟出了一份公告：華誼兄弟在美國的子公司WR Brothers Inc向騰訊控股（00700）旗下公司Mount Qinling Investment Limited發行3,000萬美元的可轉債票據，另外Mount Qinling可以擁有五年內購買6,000萬美元WR Brothers Inc股份的購買選擇權。融資所得款將用於WR Brothers Inc與Oakton Circle LLC在美國的合資公司Brothers International,LLC的運營管理、影視劇的開發制作、系列大片IP的採購等；在可轉債票據到期日或之前，Mount Qinling可以選擇將本金或本金及利息轉換為WR最高級别股權，講到尾又係同一個圈子入面一班人玩嘅遊戲。
《Avengers4: End Game》在4月24日全球上映，票房一定過百億或者上二十大票房都唔定，如果到時食住個勢，將呢間將來專拍系列大片嘅公司股權注入華誼騰訊娛樂，就一定有超大炒作空間。因為最近興起大陸莊炒概念股，5G概念、大灣區概念、植入式廣告概念、仲有新鮮滾熱辣嘅工業大麻概念股等等。
上周推介完嗰隻大麻概念股雄岸科技（01647）之後，股價一飛沖天由1.42元踢上最高1.99元，不過跟唔切或者未買嘅讀者唔需要過分失望，因為今日公司股價已大幅回落至最但位1.58元，收市價1.67元亦比近期高位1.99有不少折讓，未買嘅朋友可以考慮分段慢慢吸納，下期有機會再詳細講下。
【權益披露：本人持有華誼騰訊娛樂股份】
Facebook專頁：財技戲法
