作者：中環高跟鞋
風水看股票
狗年運程書鋪天蓋地式咁出現喺報紙攤檔、便利店、地鐵廣告等，提一提小妹仲有一個星期就要同雞年講拜拜。小妹都信術數呢家科學，時也、命也、運也，都係睇分析同統計，所以今次同各位讀者綜合下佢哋點講個股票市場，特意比較下兩位蘇師傅，分別係中信里昂分析師蘇敬培，以及知名堪輿學家蘇民峰。
我過往都有留意中信里昂的風水指數，佢哋由券商化身為風水師夠Gimmick，今年繼續係農曆新年前發布最新一期「狗年風水指數」，預計恒指今年將呈「高低高」走勢，料3月轉跌，跌勢會持續到夏季，在7月會見底回升，投資者此時會有很好的入市機會，之後升勢將持續至第四季，全年計將錄得正增長。蘇敬培指出，狗年到訪的四綠星屬木，第一季有較多木元素，故恒指有一個強勢開局。他更特別點出2月28日為雞犬升天之日，為股市的大吉日，各投資者宜多加留意。
至於另一個邊廂嘅蘇民峰，佢今年預測股市和樓市都有機會回落，其中股市在今年1月20日、2月4日或4月5日都有機會是轉勢點，一跌之後，直至年底始回升。
2月4日！今個星期受到紐約股市周二（2月6日）急瀉1,100多點的拖累，亞太區及歐洲股市全線下滑；港股2月開局四連跌，累瀉2,291點，周二早上亦裂口低開，跌幅反覆擴大，一度跌穿50天線。大市成交額創34個月高，下跌股份非常全面。蘇民峰師傅講中喎！
至於個別股份，中信里昂看好醫療及消費行業，又指電訊、互聯網、科技及公用股屬火，預期這些板塊造好。另外，由於狗年缺「金」，故預期金融及銀行業今年表現將不如去年，而汽車及機械股亦會跑輸大市。他又補充，博彩及交通運輸股或要等到10月才有斬獲。
而蘇民峰預測屬木（如服裝、木材、藥材等）及屬火（如石油、電訊、科網等）的股票都有望上升。
兩位蘇師傅對行業都有不同的睇法，嚟緊的狗年要買咩股票？各位讀者不妨參考參考一下。
