作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
華誼注資有眉目 操作仍待觀察
之前筆者講咗注資咁耐，華誼騰訊娛樂（00419）終於都肯出份似似哋樣嘅公告。話說上周四（5月2日）中午12時後出了一份持續關連交易與華誼兄弟國際有限公司有關投資項目及發行項目之合作框架協議，內容大概係話公司會同大股東（300027.SZ）華誼兄弟合作投資項目同埋發行項目，簡單啲講就係變相放一啲實質嘅嘢入去，壯大公司影視娛樂業務嘅收益。其實公司由2016年完成易手，就算收購了韓國嘅HB娛樂、參股韓國華誼華納文化基金之外，間公司一直都係靠以前健康分部收入去吊住鹽水，始終影視娛樂或者業績有提過嘅泛娛樂先係公司發展方向，當去年成功出售海南衛視49%股權後公司現金變成3.6億多，筆者都預期錢多了就會「身痕」，順理成章就係會收購母公司嘅一啲業務、資產。
雖然大陸華誼兄弟今年出了一個好差嘅成績表，無論股價跌至新低、差票房、新聞都係壞消息不斷，但正所謂瘦死的駱駝比馬大，華誼經營多年的影視王國地位依然係有喺度的，大陸運營中嘅電影院已經有28間，在建中的有1間，公告指出會將委聘華誼兄弟（或其聯繫公司）就發行項目提供發行服務，即係煮好隻飯餵埋畀你食。總之，依家只係合作框架協議，實質有啲咩都係要等5月15日前公司出個通函先知，都叫有幻想炒作空間。
睇實隻財技創板股御德國際
事出突然，上次寫完隻御德國際控股（08048），筆者交稿後竟然宣布停牌，當日仲期待以為有咩好消息，點知延長之前一般授權配股時間至5月10日，不過翻查過去上市公告記錄發現公司之前做過兩次一般授權配股都係之後宣告失效的。
筆者最擔心嘅事出現咗，第二日公司股價倒水咁下跌，心諗唔通又再配股取消？點知股價真係反映一切，前一周大升嘅勢頭消失咗，緊接住就係配股取消。其實呢啲低位配股嘅財技，喺股票世界都係屢見不鮮，明顯係預先搵定晒「頭」、開晒Account，取消只有一兩個可能性就係內部傾唔掂數，或者係個計劃有咩「KICK」住咗。不過配股取消嘅公告入面有幾隻字，係最吸引筆者注意的，「考慮到本集團日後發展及市況，本公司或考慮進行進一步籌資活動。」即係有可能未來會以唔同方式集資，有可能係配售可換股債、供股，再做多次一般授權配股等等，當然一般授權配股係最理想同埋快靚正。
呢間公司喺對上一次全購易手之後都唔算有咩大炒作，最叻嗰次都係踢過上0.48元，其餘長期都係0.3至0.4元上落，加上多年來做過幾次配股，大量正手貨源落入橫手戶口，造就大股東表面只有區區47.1%實在條街已經無乜貨剩。執筆之時股價已大幅回落至0.104元，一切還等待其後公司籌資動作，始終為免綁死資金，筆者建議有成交或者新嘅財技動作先再上車都唔遲，有新動作會再作跟進。
【權益披露：本人持有華誼騰訊娛樂及御德國際股份股份】
Facebook專頁：財技戲法
