作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
睇實隻財技創板股御德國際（三）
上周筆者叫大家睇定啲隻御德國際控股（08048），因為上次之終止配股有一句「考慮到本集團日後發展及市況，本公司或考慮進行進一步籌資活動。」大大啟示了不久將來會再有集資活動，而且筆者都有提到公司集資可能有幾種，供股、發可換股債券、配售新股等，前兩種都比較麻煩，因為估計大股東唔止持47.1%，公司在易手後曾經做過幾次配股，將「正手」轉為「橫手」人頭持有。第一次是公司當時在2012年易手後大股東為了恢復公眾持股量而以0.2045元配售現有股份，由持股89.37%大幅降至60.43%；之後大股東以差不多0.205元價錢減持了現有股份，持股下跌至56.33%，第二次配股在2013年3月進行，當時配售價為0.34元，大股東持股量才降至48.12%。公司在2017年尾做過2供1，其實淨睇CCASS大家都見到佢係超級乾身，再供股誘因唔係好大。所以筆者上一期提到，公司最理想都係配售新股。
延遲配股 股價突拉升
配股後大跌就係該次配股八九不離十係配畀街客，如果配股後大升特升，多數都係配畀「自己友」，我哋要分析呢啲財技股，𥄫到公司有配售動作出現嘅同時，當然要估埋佢配嘅對象係自己人定街客啦！之前公司做過咁多嘢，加上又供過一次股，大股東理應穩持絕大部分股權，最近一次宣布以0.102元配股後，御德國際一度大升至0.203元收市，唯公司再停牌延長協議日期，更改過一次配股價，筆者懷疑有「春江鴨子」游進場，不然股價唔會突然搶高，但上周公司再宣布進行新一輪以一般授權配售新股，呢份公告有兩個重點。第一，配售價提高了同時配售的數量增加了，由當初配售1.1億股增加至配售1.65億股；本身是擴大股本5.81%改為現在擴大股本8.47%對股價都係利好；第二個重點是今次配售只佔用了已發行股份的9.26%，一般授權授予董事配發20%新股，即今年內公司還有Quota可以再配新股。
筆者在Facebook有提醒過大家可以先觀察走勢再買入都唔遲，因為計及最近一次和之前2017年1月2日及2017年9月22日兩次配股失效已有3次之多，加上上周宣告配股失效同時股價都下跌了不少，但相信呢個只係筆者過分憂慮，因為公司今次極速再發了新的配售協議後，股價即時大升上去（現收市價為0.188元），再睇返啲成交係不斷有人掃貨買入，盤路上已經有一啲微妙嘅變化，公司剛取消完又咁心急再搞配股，相信今次配股係堅到無得再堅，極有可能將來炒作以倍計上。
【權益披露：本人持有御德國際股份股份】
Facebook專頁：財技戲法
