作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
按殼借錢都唔係人人肯做
上一次筆者出文推介了中國稀土（00769），可惜交稿時間為周二（5月21）凌晨，刊印時間為周四（5月30日），結果上周二當天大升逾130%都無用，大家錯過了我是不會有任何可惜嘅感覺，最難受是筆者看中，但自己無買，呢種感覺真係慘過輸。股價大升後，有老闆問及呢隻中國稀土想借八千多萬，講真升之前又唔問，點解要大升100%之後先嚟問呢？根本係搞唔掂，無一個金主會借，就算肯借開出嘅條件都一定係非常苛刻。至於殼股市場，雖然供應不斷增加，但不時都有老闆想搵殼，搵殼其間筆者問到有兩隻都可以賣，但對方話賣嘅方式有啲吊詭，一再追問之下原來兩隻殼都係按咗畀金主借錢，通常呢啲情況隻股票質地就會差咗，同埋個殼價都要對筆債有相應調整減值。雖然個市好似多返啲人出來傾刁，但其實市場都係缺水的，最新幾日有一隻建築殼半新股想借錢，兩個大股東加埋打算抵押七成股權借幾千萬，其實相對個LTV（LOAN TO VALUE）係好低的，問題係隻股票無成交，如果肯做少少成交借到錢嘅機會會大大提高，以前殼大把人要，依家就算主版殼價係仲叫緊三億幾，都好少係會做按殼，因為假設借方唔還錢，自己要咗隻殼又唔識搞，就算搞都會高成本同埋好麻煩，因為養殼要成本，而且維持唔到足夠業務去運作又怕被「DQ」。最後筆者搵到好友T君搭到路有金主肯做，但由於每日都無乜Turn（成交）嘅關係，年息率要收近21%，21%已包行規2%Handling，等緊老闆覆睇下佢哋借唔借囉，不過假設SAY NO，成條街都好難有人會借畀佢哋了。
同得仕變賣資產加速賣殼
記得筆者好耐之前推介過隻同得仕（集團）（00518），之前出售過同得仕大厦筆者開始留意覺得佢可能會賣殼，點知搞咗咁耐都仲未賣出，直至最近又以5,241萬元出售同得仕（杭州），其中最大的資產就係一個電子商務園嘅物業。剛剛今日公司又有公告以1,080萬元出售泰國物業，以公司賣嘢速度咁快，睇嚟想賣枱機會越來越高。如果大家要收集呢隻股票都要有一定耐性，因為街貨量不多，右邊都係只能幾萬股咁買，假設要一次過買成球就算要掃高十檔都係買唔到幾多貨的。
【權益披露：本人沒持有上述股份】
Facebook專頁：財技戲法
