作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
猛人系列：十年磨一劍要出手了？
其實貿易戰搞咗咁耐，個市場都差唔多適應咗TRUMP總統出口術，基本上呢啲消息麻木了就唔會再有咩大波動，大家見香港有過百萬人上街示威，個市場已經無以前2014年雨傘運動咁大反應，之前恒指係大跌差不多過千點數，而家只係區區回落數百點，當大部分壞消息都反映了、消化了時候，就短期而言算係蘊釀見底了。相信未來過埋本周在大阪舉行的20國集團峰會後，都唔係有大跌嘅可能。
相信大家都有感受到上年個市係有幾咁差，大市由高位大跌8,000點左右，基本上跑刁嘅行家都係無嘢好做，老闆連出來傾嘅興趣都無，又點會有生意呢。老闆缺水、市場莊家無水到又唔會炒股票，莊家唔郁手無落餌你估個個散戶都係願者上釣咩，就算有人買都無交投，個市場都唔係「活」的。近呢幾個月筆者留意到好多老闆都肯出來傾下刁，起碼願意出來傾下，咁個市場都係餓咗咁耐，點都要炒返幾味小菜掛。
品牌中國易名「BC科技集團」
就係今日筆者在披露易睇到4月初一間公司的改名公告：品牌中國（00863）建議改名為「BC科技集團有限公司」，當然改名唔一定大炒，但有啲公司背後有猛人射住就唔同講法，就好似隻圓通速遞（06123）咁（前名先達物流），一宣布改名後大升差不多有一倍。品牌中國背後嗰位「猛男」十年磨一劍的高振順都真係唔嘢少㗎，上年公司宣布高生以每股3.18元入股74.48%及強制無條件現金要約，復牌後立即發揮高生點金聖手嘅能力，陰陽燭圖好易食咗偉哥咁，股價一度狂升至25元、市值超過60億元。過去幾年高生有份沾手的股票都有至少5至10倍升幅，有拉近網娛（08172）、阿里健康（00241）、阿里影業（01060）、歡喜傳媒（01003）、光啟科學（00439）等等，全部都係改名後變身成為天皇巨星。
公司喺全購後就安排Hugh Douglas Madden和David James Chapman為執董，兩位都係區塊鏈領域的「猛男」，之後一值無咩特別動作，只係授出獎勵購股權，但4月初宣佈後名後又似乎有後著跟尾，公司根據一般授權以每股5元發22,876,360股新股擴大股本8.04%，其中一名股東認購的2,000萬股嘅資金用來抵銷公司未償還佢嘅貸款，公眾股東只有26.04%。望入去CCASS無容置疑係股權高度集中，筆者有信心佢起碼有九成乾度以上，加上版面買賣兩邊十檔都係寥寥無幾，以佢哋入股價3.18元計算現價5.02元都只係高出57.8%，剛剛配股又配合埋改名，大家信唔信高生會煲無米粥？
【權益披露：本人沒持有上述股份】
Facebook專頁：財技戲法
