作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
猛人系列：新一代賭王的電影娛樂王國（一）
因為筆者獲邀出席寧波一間上市公司華眾車載（06830）的反向路演活動，呢篇文章一早在上周已經準備好。
之前介紹過猛人系列高振順先生的公司BC科技集團（00863），公司改名加上緊接的配股動作應該有後著跟尾，相信大家都聽過佢之前操作過的公司輝煌往績都有番一定信心保證，咁啱筆者最近翻查公告，發現有一間創業版公司仁智國際集團（08082）同樣都可以列入「猛人系列」監察名單，可能會分兩至三個篇章分享。
重磅人物撐仁智國際
話說公司剛剛以每股0.38元完成全購，要約人為周焯華先生，公司全購後立即改名「太陽娛樂集團有限公司」，淨係呢個改名已經係不得了嘅亮點。相信大家對周生應該唔會陌生，十幾年前香港人淨係識「英乜娛樂」，依家太陽娛樂無人不識，可以話係響徹中港澳甚至整個亞洲區。話說2012年香港電影業景況都唔係咁樂觀，當年十大電影票房入面代表香港嘅電影只得《寒戰》入圍，但太陽娛樂發行一套三級電影《低俗喜劇》大收三千萬票房都已贏九條街，原因係前者製作費以億元計，《低俗喜劇》以800萬低成本搵咗彭浩翔導演僅僅拍攝了12日，而呢12日要搵齊杜文澤、鄭中基、雷宇揚、谷德昭呢幾個搞死抵死組合成為班底，仲要咁多演員要剛剛好就到個期去拍攝，簡直係電影界一大奇迹。
早前筆者都有寫過電影板塊的上市公司，繼今年國內爆款電影《流浪地球》大收逾50億元票房後，似乎有好幾位影業巨頭都磨拳擦掌，睇準電影呢舊肥肉想分一杯羹。太陽娛樂自2011年成立至今已經發行同出品咗約50至60部電影：有《殺破狼2》、《危城》、《掃毒》、《逃出生天》等等，拍攝製作到發行自有一套生產鏈及分銷已經相當成熟，值得留意嘅係公司改名後極速委任唐才智先生為董事會主席、鍾楚霖先生為行政總裁。其中唐先生來頭都唔少嘢，擁有公司23.61%之外更加係周焯華先生的左膀右臂，經佢同黃柏高Paco手將太陽娛樂文化搞到有聲有色，澳門大部分的演唱會都係佢哋籌辦，絕對係公司靈魂人物。
下一期會講下周生在數年前已經開始布局仁智國際集團的蛛絲馬迹。
【權益披露：本人沒持有上述股份】
Facebook 專頁：財技戲法
