作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
猛人系列：新一代賭王的電影娛樂王國（二）
上次交稿時推介香港國際建設（00687）都係1.39元，轉眼間現價收市已1.53元了，筆者相信會繼續有不錯升幅，因為公司背後有實力雄厚的黑石集團發功，無論資金或者其他「窿路」都無難度，絕對擁有強大後盾。有人歡喜有人愁，每當大市無晒方向嘅時候都係熱炒新股，好似最近中煙香港（06055）、鷹普精密（01286）、坤集團（00924）呢幾隻新股都有相當唔錯嘅升幅，隻隻都成50%至100%開，亦因為咁其他股票就會無咩人理。嚟緊仲要有一隻百威亞太（01876）上市，相信亦都係因為成個市場大部分資金都係留來抽百威，所以最近大市成交金額全日都係唔過600億元。
今日筆者繼續講下猛人系列仁智國際集團（08082），上期講到新一代賭王周焯華先生準備擴大佢嘅娛樂版圖，事源公司剛剛完成全購後公司立即有動作迅速改名「太陽娛樂集團有限公司」，睇個名就知道公司將會喺未來注入太陽娛樂業務，大家諗下淨係周生全購公司股價已由0.4元打到上現價0.73元左右，假設公司將來再公布一個注資消息，股價仲唔倍升？
配股養殼
本身公司前身係做殯儀服務同依家簡直係風馬牛不相及，上回提到最近公司委任了唐才智為董事會主席，鍾楚霖為行政總裁；唐才智係太陽娛樂文化嘅創辦人，周生布局呢隻仁智國際早喺2015年已經有迹可尋，2015年初唐生已入股公司9.95%，2016年中做了一次一般授權配股，而湊巧配售代理剛好是太陽國際證券，筆者認為該批貨已落入自己人手上。除此之外公司開始發展娛樂業務，收購從事音樂娛樂製作、藝人管理業務公司、開始投資製作電影同時以每股0.16元印19.82%新股給唐生，再喺唔夠兩個月公司再做多一次又係每股0.16元一般授權配股20%，配售代理就當然都係太陽國際證券啦，唔洗筆者多講大家都知咩事。
雖然公司已經喺早幾年做了幾次配售等財技操作，大家唔好以為咁就完事，就喺2018年11月公司再次以每股0.33元一般授權配售5.18%新股，配售代理繼續都係太陽國際證券，配售完成後唐才智持23.61%、鄭丁港持23.61%（那些年鄭生都係同周生拍住上，大家可以翻查太陽城集團（01383）嘅股權記錄、周焯華持11.81%，當時公眾股東只有23.77%！仲未計呢度入面極有可能有前幾年一般授權嘅人頭友好持倉。
睇到呢度，大家都心裡有數隻仁智國際已經係乾到無朋友，到今年4月初鄭生先出售持股23.61%予周生，造就最近呢單全購。值得留意嘅呢單全購完成後，前股東徐秉辰先生仲持有12.27%，大家如果細心啲睇下太陽國際（08029）本身都係佢嘅。周生布局咗呢隻殼咁多年，筆者真係非常期待佢往後發展！
【權益披露：本人沒持有上述股份】
Facebook專頁：財技戲法
