作者: 張家豪，特許技術分析師（CMT），中順證券投資經理。熱愛羽毛球。Facebook：CheungKaHoInvesting
有咁耐快活 有咁耐家樂
執筆之時，G20會議尚在進行中，但到了文章刊登之日，中美貿易談判結果便已出爐。
傾得成定傾唔成，影響當然大。單純以恒生指數分析，傾得成理應可升至30,000點，回到5月加關稅前的水平。而傾唔成，則很可能會回到27,000點，5月尾氣氛最差時的水平。
執筆時，恒指剛好在28,500點附近，在上方和下方的目標中間。即公布結果前，買上定買落的賠率係一樣，反映市場認為傾得成傾唔成的機會都係一半一半。
開估前大市無方向，不如講下個股。
有兩隻股票特別想同大家分享，是大家樂（00341）和大快活（00052）。
兩隻股票剛出了最新的全年業績，雖然係兩兄弟，不過就同人唔同命，大家樂盈利增長29%，而大快活則少賺17%。可以說，令不少人大跌眼鏡。
為何大跌眼鏡？因為大快活過去4年盈利都有所增長，相反，大家樂盈利卻連跌3年。亦因如此，大快活股價上升了近一倍，而大家樂則由高位最多下跌了四成。
面對如此往績，再加上大快活估值較大家樂低，不少評論都建議選大快活棄大家樂。然而，他們卻忘記了一個很簡單的道理。
兩家公司都十分相似，提供類似的產品，面對相似的客戶及競爭環境，而大家在日常生活中亦可觀察到兩家公司的生意基本上都差不到，不會一間拍烏蠅，而另一間爆晒棚。那又有甚麼可能會一直出現一家公司盈利不停上升，而另一家盈利不停下跌的情況呢？
就係無可能囉。
