作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
同得仕賣殼已是板上釘釘
筆者上回提到（01876）百威亞太上市，搞到最近大市成交金額全日都係得嗰500幾億元，而家宣布終止上市有好有唔好，至少個市場lock住嘅錢出返來，成交都理應大番少少。
上年至今筆者不斷有留意開一隻清緊殼肉嘅公司（00518）同得仕集團（集團），公司1988年12月15日上市，主要從事成衣製造及銷售，算係老牌上市公司。之前出售過同得仕大厦，筆者開始留意，覺得佢可能會賣殼，始終咁核心嘅大廈都賣走，加上生意難做，都無咩好留戀吧。公司去年不斷計劃出售主體資產業務：昇陽（海外）主要做零售業務、物業及投資控股，另外呢間公司持有深圳百多爾100%股權，佢嘅零售業務涉及同得仕自家品牌betu服飾產品內部設計同埋零售銷售，間公司在浙江杭州、深圳都持有物業（深圳同得仕大廈）；另外公司出售了同得仕貿易，呢間公司主要做貿易、製造業務、物業控股，同時擁有中山同得仕100%股權，就係呢個出售上年叫停了。就喺月前最近又以5,241萬元出售同得仕（杭州），其中最大的資產就係一個電子商務園嘅物業。剛剛早前公司又有公告以1,080萬元出售泰國物業，完成出售同得仕（杭州）後，公司更擬將出售事項其中所得淨額的500萬元用於分派特別股息。上星期昇陽（海外）捲土重來再次出售，潛在買方仲要出1,000萬人民幣誠意金添，睇嚟賣殼都係板上釘釘的事。雖然現價0.56元升了不少，但筆者認為始終呢間公司乾度十足，另外公司咁大決心去清走殼肉，睇嚟都係一早搵到買家，呢個咁嘅市況都敢入市買殼，一係就傻佬，一係就背景非常猛料，大家可以買入博賣殼一段倍數升幅炒作。
【利申：筆者沒持有以上股份】
