作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
從刑事拘留期限看承興國際
近呢兩個月香港嘅市道一蹶不振，就連股票市場都好似中咗風咁，其實呢個根本係惡性循環，啲人喺金融市場搵唔到錢自然消費都會減少，零售飲食生意大跌，自然佢哋都會更加減少開資，加上內地人來港消費好多都係求其食餐茶記就算，因為佢哋來香港主要目標買幾樣嘢，要食返大陸食好過，因為依家返大陸搵嘢食真心好過香港，有質素有水準兼價錢實惠；唔係專登踩自己地方，香港真係無咩好玩，人哋廣州都開埋一個融創雪世界300元至400元人民幣包借全套雪服、滑雪鞋、頭盔、滑雪板，可以在室內滑雪場玩足幾小時。香港現時社會環境氣氛都係導致大市成交稀少嘅主要原因，過去香港大市基本上有北水撐住，大陸唔放水來香港所以每日只有600餘億元成交金額。無成交經紀就頭痕，唔係個個經紀都有幾個大客日日炒大股，贏就固然好，呢啲市有幾多個係會不斷贏？
上回講到隻承興國際控股（02662）因為大股東羅靜俾上海市公安局楊浦分局刑事拘留，股價暴跌後反彈再回套後停牌，不幸中招嘅朋友最迫切關心嘅問題一定係究竟呢個停牌仲要停幾多日呢？依家羅靜係俾人爆料話佢騙取資金同埋偽造合同，到筆者行文之日公司出了一份上市公告，話已向該公安局作出查詢但未獲回應，現暫停羅靜作為公司主席及執行董事的職權，公司股份將會繼續暫停買賣，待另行刊發有關刑事拘留、業務營運之最新情況及公司將採取進一步行動之內幕消息公告。
承興國際 前途堪憂
首先依家乜嘢都講Fact Check，而大陸刑事拘留期限法律規定係一般不會超過14日，最長不能超過37日，佢6月20日被刑事拘留，咁刑事拘留要同時具備兩個條件：第一係拘留對象係現行犯或者重大嫌疑分子，現行犯係指正在實施犯罪人；重大嫌疑分子就係指有證據證明具有重大犯罪嫌疑嘅人，第二係具有法定嘅危急情形之一，刑事訴訟法第80條和第163條對於公安機關拘留同埋人民檢察院拘留有唔同規定（太長不贅），公安機關拘留期限係根據刑訴法第89條。如果羅靜由6月20日開始被拘留，現已超過一般時限的14日，即是好有可能係重大嫌疑而且同時係有有力證據，筆者照睇就唔多樂觀。
今期貼士就睇「炒股幫升股派街坊」個比賽啦，期殼嚟嘅。
【權益披露：本人沒持有上述股份】
Facebook 專頁：財技戲法
