作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
已賣了的主板期殼（二）
前一期筆者推介過的同得仕（集團）（00518）照睇上周五的股價似少少對版。以7月11日當天公司的上市公告指出：「為進行盡職調查，潛在買方在支付誠意金後，將有權享有20天的排他期。倘於盡職調查過程中，潛在買方未發現任何重大問題，則初始排他期將延長25天以協商正式買賣協議。經雙方同意後，可進一步延長排他期。」屈指一算剛剛好8月5日就係公司協商正式買賣協議的參考日期，當然可以再延長時間啦，但如果睇股價上就似有少少啟示喇，加上呢兩星期有見到少量版面過貨，令人感覺有啲似好事近。
上一篇文筆者話收到風K2 F&B HOLDINGS LIMITED（02108）以期殼方式賣了，點知交稿後都未正式出街，股價已由0.235元極速踢高至最高0.35元，升幅高達48.9%，幸好筆者有補飛在自己Facebook專頁稍作提示，希望有睇到嘅讀者可以賺番一轉快錢。上周大市已累計下跌接近兩千點，以K2 F&B HOLDINGS LIMITED呢間公司股價嚟參考，抗跌能力都好強，因為潮退後就會知道邊個無著維多利亞的秘密，而家股價都仲有0.295元；另外筆者觀察咗幾日，維持秩序的買賣牌都未有消失，相信好快會捲土重來，未買嘅讀者3毛子樓下又有一轉賺錢機會喇。（前提係希望呢篇文出街時股價未衝高上去）
今期筆者心水係另一隻期殼股，賞之味（08096）。雖然而家創板殼價近乎零，但佢個期殼價同現價0.2元都有非常多嘅水位，又係同隻K2 F&B HOLDINGS LIMITED差唔多時間上市，而家只有1億市值細細間容易食。
【利申：筆者沒持有以上股份】
