作者:Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
收貨已久的異動股恒達集團
依家個市場氣氛又唔算係好差，只係無成交，明顯係資金唔喺度，所以筆者在另一個平台推介買隻日清食品（01475），市道唔好啲窮L自然會食多咗即食麵、杯麵，起碼唔會餐餐大魚大肉；股市交投淡靜直接影響好多中高端的消費，夜店少咗生意，明星姐仔就算搵老細都會被壓價；無人出來傾刁就連包間房叫定女都慳返。
搵錢有路數
最近出席一間上市公司酒會，個個大哥前大哥後懶係扮哂friend派卡片就預咗㗎喇，好多行家都係出來搲撈，個個都話有嘢搞或者好Q多嘢搞，有新刁實預埋你咁話，老實講到第二日好多都唔知邊個打邊個。呢啲酒會同某啲商會都係一樣，其實嚟嚟去去都係嗰班行家，只要細心去睇就會發現下一次又係至九成幾都係啲熟悉臉孔，正如收到某間上市公司大股東想借錢，隨時問Wechat入面十個行家有十個都答你：我又收到喎。除非你係特別猛料或者直情係老細，如果唔係單刁九成九都係會「壽終正寢」。
咁啱有個兄弟在相熟匯款公司做，諗依家咩都要做下就嘗試開條新嘅戰線，基本上介紹到人去佢哋由大陸匯款來香港，公司畀佢個員工價一定平過街價，只要Mark高少少就一定有得執，聽聞有個證券經紀個客打千幾萬錢落嚟，食佢三個點都非常和味，差唔多有40幾萬元（當然要分好幾次搞啦）。所以如果有讀者有朋友有需要，多少都無問題，可以私下介紹筆者搵個兄弟幫手齊齊分錢，現金交收。
上一期筆者話講下一間街貨可能只有2%嘅物業發展公司，適逢今日股價剛好有少少異動，咁就唔講唔得喇。筆者要介紹嘅就係恒達集團控股（03616），呢間上市公司去年11月12日上市，當時招股價為1.24元。現價1.11元市值只有區區13.32億元，以物業發展公司市值嚟講Size算係細，加上公司自上市起超過半年都無太大炒作，估計差不多有九成幾以上乾度，最近呢兩個月輝立證券不斷沽貨而同時中州證券、富途證券每日都在收貨。嚟緊本月21日公司會公布業績都係輕微下跌，相信未必對股價做成太大影響。眼見今日異動，股價曾一度踢高至1.2元，唯收市主要壓回1.11元收市，筆者認為有機會有春江鴨子入場，段估咁嘅市況唔會有散戶無啦一直由1.05元買到上1.2元吧？依家趁股價回番些少大家可以偷雞買入玩返轉。
【權益披露：本人沒持有上述股份】
Facebook專頁：財技戲法
