作者: Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
承興要復牌 五大條件 缺一不可
個市好似好番少少，成交明顯多番800至900億元，不過由低位上來都叫反彈差唔多千幾點，係咪真係好番就要睇多一兩周，睇下可唔可以定到喺26,000點樓上。不過香港有樣嘢幾好，無論發生幾大鑊嘢都好，香港人都會好快唔記得，好似咩事都無發生過咁。
雖然筆者無買，但一直有跟進承興國際控股（02662）的情況，因為都停牌了一段比較長的時間，公司在上周出了一份復牌指引公告，內容就係公司要達成聯交所開出的五個條件先可以正式向聯交所審批復牌，真係「五大條件，缺一不可。」通常停牌公司都有分自願同非自願的，例如公司要公布一啲敏感資料，或者係潛在收購合併、涉及配股、供股等等都係必須要停牌的；公司被沽空機構出沽空報告已致股價被洗倉暴跌，為咗要止血爭取時間畀管理層解畫，公司就要自行要求停止買賣；如果發現公司有違規情況出現，公司可以被勒令停牌。
承興接獲復牌指引
承興國際就係因為主席兼執行董事羅靜俾上海市公安局楊浦分局刑事拘留，雖然公司已出公告澄清了涉及公司只屬大股東的私人公司，但始終咁大手貨被凍結咗，公司都唔係可以咁容易獨善其身。而家聯交所開出條件就係要求公司披露有關羅靜被拘留細節（包括若干媒體報道稱刑事拘留與涉及制定合約及使用該等制定的合約獲得融資的欺詐活動有關）及其對公司財政及營運狀況的影響。首先呢樣嘢唔係公司管理層可以控制得到的，可能真係出咗事或者已進入內地司法程序，變相好多嘢根本就唔講得或者佢地都未知幾時會有消息。之後嘅條件係證明並無管理層誠信的合理監管問題或任何對公司管理及營運有重大影響力的人士將為投資者帶來風險及損害市場信心、證明其遵守上市規則第13.24條以保證本公司股份（「股份」）繼續上市、澄清本公司之現有股權架構；及公佈所有重大資料，以供本公司股東（「股東」）及其他投資者評估本公司的狀況。第2、4、5項條件相對比較容易，寫得靚靚仔仔、有紋有路就可以，至於要守上市規則第13.24條就唔係話寫幾行字就有，因為要向聯交所證明公司有足夠的業務運作，老闆俾人拉咗好多時都唔係其他人可以話到事或者有能力去處理。
依家承興要回應哂聯交所呢「五大訴求」，仲要每樣都令佢滿意先復到牌，所以今次都幾難搞。
【權益披露：本人沒持有上述股份】
Facebook 專頁：財技戲法
