作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。Facebook專頁：財技戲法
揀平貨都要落足眼力
大市雖然由低位回升返上26000點水平，但始終中美貿易問題仍然未解決，加上香港政經環境不明朗，指數依然有下調風險。香港股票市場已經到了「賤物鬥窮人」的狀況，其實有多餘錢的朋友都可以做下研究去尋寶。以主板上市公司為例，雖然殼嘅價值已經大幅貶值至最近3億元左右，但呢個有價無市情況下都唔代表佢完全零價值，做得上市公司就爛船都有三斤釘，始終都值啲錢嘅。筆者在假日做了少少研究，創業板嘅公司相對風險比較大，而且近於零殼價，最近有間公司叫利駿集團香港（08360），上個星期公司發了一份控股股東出售股份及主要股東變動的公告，內容有關大股東以756萬元出售公司24.2%股權予一名獨立第三方，唔夠一千萬可以買咗個控股權，所以創業板嘅價值筆者真係唔識睇了。
以現價計，市值等同或低於1.5億元的主板上市公司有106間（撇除有內資股佔比的），又要再撇除當中有15間21章公司，因為21章公司唔值錢，所以只有91間，而市值低於1億元的公司有83間，當中不乏市值大折讓於其資產淨值的公司，大部分都折讓60至80%以上，呢個當然只能作參考，因為除咗睇資產淨值有其他嘢都可以篩選，例如CCASS頭間券商加上非流通（紙股票）是否有8成以上，因為有8成以上初步可以理解為股權集中，篩選完出來的公司都可以對比過往集資過的上市公告去估計批貨的源頭來自邊度，另外有一樣比較少人去留意嘅就係參與者數目，即是券商數目。一般嚟講就算係股權集中，券商數目愈少愈好，因為代表當中參與者數目少，介乎100間至130間的數目已經算少了。執平貨時真係要落足眼力去睇，有時揀到好平嘅都未必係好，因為有可能間公司負債高現金少，沒有償債能力；又或者業務上開始有啲危危乎，未能滿足《主板規則》第13.24條，沒有足夠的業務運作或者擁有相當價值的資產，假設買中一隻可能被DQ嘅就唔好喇。
【利申：筆者沒持有以上股份】
