作者: Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
經濟一環扣一環
呢兩個月以來因為香港修例風波以致示威衝擊不斷，已經對經濟造成一定破壞，筆者首先表明一定唔會有任何政治立場。好多人話香港嘅零售業加埋旅遊業佔香港GDP唔夠10%，就算零售、旅遊業死都唔會係最大影響香港經濟，咁呢個講法就大錯特錯。經濟永遠都係一環扣一環，旅遊業死，少咗旅客消費自然搞到零售業慘淡，零售業啲人搵唔到錢自然平時都會減少消費，例如食平啲影響中高檔次飲食業、買少件衫睇少場戲、搭少啲的士、溝女都係嘥錢等，再有啲唔係誇張真係搵唔到錢供唔到樓，做生意更加白交租，總之你諗得到嘅都有可能發生，因為人到窮時就好多嘢都會「縮」。筆者學生年代時有個豬朋狗友就係喺正女友生日前分手，分手後數周復合，一問之下原來係唔想送生日禮物。香港嘅經濟就等同食物鏈，無咗任何一個部分都會好Q大鑊。金融市場都係，呢兩個幾月每日成交都縮，只有兩句口訣：升市無成交跌市大成交，今日Day Low等於明日Day High。
勿陷陷阱股
呢排有朋友問係咪入市時機，有乜股票好買之類。其實大家點解唔調轉諗下，有乜嘢股票唔好買呢？首先股權太散唔買，CCASS都睇到散就買來無意思，因為太散嘅公司難炒起；市值太大或者已經炒起咗嘅細股唔買得，話明炒起咗假設一倍，你買入時仲博一倍等於人哋嘅四倍，無理由咁豬兜去買；公司財務報表睇到負債高現金少就一定要避開，假設佢償還唔到筆債就意味住佢有機會去集資，搞到要供股就一定唔會係好嘢。
依家買股票都仲要睇間上市公司有無一啲隱藏陷阱，例如是否有抵押股權在某某證券行，因為抵押得股權去借錢連帶一定係高息，年息坐底起碼14至18厘息，筆者甚至有聽過有啲要20幾厘息先肯借，如果20幾厘又抵押得多都肯借的話，咁都預咗佢係無得還最後要食埋佢隻殼，呢啲公司有被洗倉風險，好多都係有沽空機構背後做嘢，因為絕大部分都要每月還息都好難會還到。不過唔係隻隻股票都有得沽空，穩陣嘅又可以Check 下先。最令人頭痛嘅就係永不超生股，即係聯交所因為公司業務或者資產不足而要撤銷公司上市地位，根據《主板規則》第13.24條（創業板規則17.26），沒有足夠的業務運作或者擁有相當價值的資產，例如生意長期低迷、入不敷支，聯交所就可以質疑公司無法維持上市要求停牌作出解釋或者提交可行方案，如果指定期內都搞唔掂就真真正正「壽終正寢」。
個市咁差，不妨諗下啲貼地嘢，大快活集團（00341）及大家樂集團（00052）去收息防守下都唔錯。
【權益披露：本人沒持有上述股份】
Facebook專頁：財技戲法
