作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
真空期殼價無得參考
正如筆者上周講過，大市要企穩26000點先可以放心，但始終都係守唔住。嚟緊呢個貿易問題一定會持續搞到明年年底，因為呢個係「侵侵」大選最大籌碼。而家香港市況相當嚴峻，在政治風波影響下經濟開始出現問題，往往都係股市首當其衝，市面已經有好多股份跌至極不合理水平，就殼股而言通街都係等人買嘅殼，問題係殼價仲可唔可以作為一個參考呢？分析殼股通常都係參照最近成交殼價，但買賣殼活動喺呢三、四個月完全绝迹，有咗呢段真空期加上經濟環境、監管規例影響，買殼後又要等三年先可以注資，無疑係會令大部分買家卻步。現時殼價相信已經比對上一次成交殼價跌去唔知幾多成。就當你去揀一啲股價同公司資產淨值有大幅折讓又股權集中嘅公司都係無用，因為好多公司依家主要問題係無錢頂，最近筆者都有留意到好多細股都係無刻意去維穩住個股價，由得個股價自由浮動，因為市場莊家都係收錢做嘢，如果收唔到錢又點會出買牌幫老闆去頂價呢。
選擇逆向ETF【彈中，黑體】
細股唔係買唔過，但買咗要預有一段長期時間去坐貨，殼股需要養一年一千萬算係基本，而且仲有被聯交所DQ嘅風險，如果背後老闆唔係有咩實力，呢啲時勢都係避一避會穩陣啲。最近有部分朋友玩逆向ETF投資，筆者就推介FI二南方恒指（07500），有兩倍槓桿兼成交大，當中不涉及孖展。除此之外，相對其他輪及牛熊證，呢類逆向ETF無引伸波幅、又無到期日同埋強制回收等，喺依家呢個市場不穩定情況下，大家認為個市向下多過向上的話，都可以用佢去做一個中短線炒賣。
筆者沒持有以上股份。
Facebook 專頁：財技戲法
