作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
細股要避一避
正如筆者之前講過，大市弱成交唔夠大嘅情況之下，大家可以唔好理啲細價股住，因為細價股嘅玩家們都繑埋雙手嘅情況下，買來都係一個字：等。當你等到寂寞到夜深時除咗有啲凍之外，基本上都係要等，等到幾時？唔知！有可能等到尾田榮一郎畫完《海賊王》都未等到。
殼股交投零成交，就算有都係收到風係期殼，都係只聞樓梯響，呢幾個月都未見有真正賣殼出現；市場都係觀望為主，嚟緊新規一出注資期又多咗時間，到時睇下有無高手有新招拆解，分段逐少注資都未嘗唔係一個方法之一，但就目前大環境情況而目，除非閣下啲錢係超唔等駛，或者買完等佢三五七年都無問題嘅話，筆者都係建議避一避細股，等個市場有力兼有方向性指標時先追入都唔遲。依家最穩陣就係以大成交類嘅大、中型股入手炒作，因為就算大市極度波動都輸極有個譜，成交大嘅股份當要走佬時，「左邊」都一定有人接貨。
中國科培諗得過
賭股唔得、零售板塊全線下跌之下，唯有就係諗下啲現時環境最受惠或者最安全嘅股份，教育板塊就係現時嚟講相對比較堅挺，尤其係內地教育股。內地教育板塊有十多隻：楓葉教育（01317）、新高教集團（02001）、天立教育（01773）、中國科培（01890）、希望教育（01765）、澳洲成峰高教（01752）、中國新華教育（02779）、宇華教育（06169）、21世紀教育（01598）、銀杏教育（01851）、東方大學城控股（08067）、睿見教育（06068）、成實外教育（01565）、民生教育（01569）、中教控股（00839）、中國春來（01969）、卓越教育集團（03978）和博駿教育（01758）。就以今日成交量去分，有一千萬成交金額的就已經可以篩選到七間上市公司出來，試諗下呢啲市況都有咁大成交都有返咁上下，七間上市公司入面幅圖最靚仔一定係中國科培（01890），呢間公司今年1月25日上市，當時招股價為2.48元，以現價4.13元收市加埋末期息0.1元足足有70%升幅加利潤，集團為華南地區一家領先的民辦高等教育營辦商，專注於專業型教育，在國內市場潛力非常大。
科培教育主要搞工程經濟、管理、教育及藝術專業教育，另外公司的肇慶學校為中等職業學校包括有汽車服務、電子商務及機電技術應用，同我哋香港專業教育學院（IVE）、明愛有少少類似。市值夠大成交夠多，又具增長潛力，科培完全符合呢三大原則。
【權益披露：本人沒持有上述股份】
Facebook 專頁：財技戲法
