P5 財技戲法
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：孖展新規弊多於利
最近多番啲行家問股權抵押借錢，究竟係咪個市有起色呢？當然唔係啦！睇成交都係700幾至800億元，一啲誠意都無，要個市旺番起碼要有千幾億元以上成交金額先夠，依家每日啲成交只可以話「打醬油」。最主要原因筆者認為係嚟緊10月4日證監會出嘅券商孖展借貸新指引，其實中美貿易戰再加上近幾個月政治風波，證券行生意都已經一蹶不振，少咗散戶入市買賣佣金收入自然少咗。
另外因為香港局勢問題IPO已經停咗幾個月，百威亞太、阿里巴巴都打退堂鼓又少咗唔少收入；本身證券行都有做「放數生意」就係孖展抵押融資，依家又收緊兼限制券商孖展額，同埋新指引嘅申報表好鬼麻煩，合規部又要搞一大輪，可以話係「多膠魚」，筆者覺得係弊多於利。好多借錢嘅刁都係連帶一啲附加條件，例如「市值管理」，個上市公司老問攞啲貨過來借，必然係想DVP（Delivery Versus Payment）攞錢走人，雖然每個月都會畀高息，但個經紀始終都係有一定風險，個客還唔到錢就要上身，所以通常都要求個客每個月最少做幾多「Turnover」，目的都係攞返少少渣嗱。
新孖展指引規定孖展總額上限為其資本五倍，即係資金成本貴咗息又要再收高啲，本身已經貴息再加嘅話仲點會有人借呢？借得嘅都預咗佢會走佬吧！指引仲有一點就係唔可以太集中，例如三間上市公司借錢係個別分開三間去睇，依家係如果呢三間係有關聯嘅，就當一個獨立個體，所以借出去嘅錢又會少咗。筆者估計因為就快實行券商孖展借貸新指引，所以好多券商都叫啲客「搬倉」，所以呢排多咗好多行家問啲冧靶借唔借錢囉！
換CB博炒番轉
雖然個市無咩得別好消息，但筆者都有keep住睇上市公告，上次講完飲食板塊，咁啱有一間上市公司龍輝國際控股（01007）行使可換股債券，呢批可換股債券（CB）換股價為0.1025元，佔已公司發行股份22.79%及擴大已發行股本18.56%，依家通常CB都係種個債落去都好少會行使換股，行使得都基本上會炒番轉，公司現價0.148元市值7.68億元算係貴少少，但勝在有實質業務；集團主要於中國從事火鍋餐廳業務，主要品牌有「輝哥」、「小輝哥火鍋」及「洪員外」。「輝哥」食店主攻高端市場，賓客對象包括商務人員等，而「小輝哥火鍋」及「洪員外」食店面向中端市場，客源較廣。睇番CCASS相對集中，呢幾日大成交股價踢上，再加埋換CB，可能仲有得炒！
Facebook 專頁：財技戲法
【權益披露：本人沒持有上述股份】
