P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：東瀛遊可以諗下
就香港目前情況而言訪港旅客大減，旅遊業相關生意一定係大受打擊，旅行社影響就一定有，始終經濟差咗都會減少消費旅行意欲；但另一方面，旅行社的旅行團多數目標客戶群都係中年以上至長者為主。講真，依家出面咁多旅遊書、訂機票酒店APP，基本上後生一輩都好少會跟團旅行，因為跟團就要限制咗旅遊景點、酒店無得揀、團餐又難食諸如此類，甚至去購物成日都會聽到我哋幾點就要返來呢度集合等等。至於老竇老母嗰一輩就唔同，佢哋唔鐘意周圍搵車搭，唔鐘意「捐窿捐罅」，最主要係佢哋覺得麻煩，或者係唔想嘗試要學習或者係自由行，但中年或者退休人士無疑係高消費力嘅一群，「所謂啲老鬼一日唔X，旅行團都仲有得做」，但筆者認為呢行生意只會越來越難做。
有好多旅行者公司除咗經營旅行團生意之外，都有發展自由行產品或者輔助性旅行相關產品及服務嘅業務，就好似2014年11月上市的東瀛遊（06882），除日本旅行團為主，澳洲、歐洲、韓國旅行團為副之外，公司都有相關自遊行業務，例如銷售機票、酒店住宿、公共交通票、主題公園門票、旅行保險售賣服務的佣金收入，以及就向日本的紀念品及商品供應商提供的匯款服務收取的手續費。公司喺2017年尾在大阪開了間自家逸の彩酒店，另外收購咗沖繩六幅土地來起酒店，2020年第四季開始營運，已經投入營運；之前在逸の彩酒店隔離以4,886萬港元興建的溫泉浴大樓已經在今年第一季投入營運，相信會有協同效應。
睇番公司現市值2.71億元，淨資產都有3.45億元，大股東又持七成以上股權，就算生意差啲都仲有炒股票嘅誘因，所以東瀛遊都可以諗下。
筆者沒持有以上股份。
Facebook專頁：財技戲法
