P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：孖展新規禍害深遠
國慶期間都無咩心水，成交繼續都係差不多600至700多億元，唯獨有啲起色係IPO開始多番少少。其實9月初開始已經多番啲IPO，但呢個只係復甦表象，因為月初至月中上市的都只係只是之前幾個月因為社會運動Hold住唔上的公司，但拖到9月份就點都要上，始終錢就畀咗，唔上市就笨。踏入10月先開始正式多番啲正常新股，主板創業板都有，筆者估計大市於11月過後或明年初會有好轉，因為2019年區議會選舉已過，到時好多嘢都已成定局，大市有望正式回穩。
10月4日孖展新規正識生效，證監會就孖展新規由發表諮詢文件到編纂為指引條文及標準化再生效可謂雷厲風行，只有差不多一年時間，可見證監在收緊孖展方面落重藥，而且有不少證券業界人士提出新指引「一刀切」過分嚴苛，但證監表明立場絲毫不退讓，有唔少公司波及其中，就筆者生意都大受影響。新指引分八大類，包括保證金貸款總額、保證金客戶信貸限額、證券抵押品集中風險、保證金客戶集中風險的監控、證券抵押品扣減率、追繳保證金通知、停止進一步貸款或購賣證券及強行變現、壓力測試和通知規定等。
溪雲初起日沉閣，山雨欲來風滿樓。因為借錢難咗，所以最近風聲鶴唳，有唔少股票面臨斬倉或者極度需要搬倉，就好似今日有個大佬級的中間人問筆者有三隻股票想押股借錢（其實三隻入面得一隻係有條件借），筆者問呢位大哥貨主想按幾多？對方答：「你話啦，依家出面都係股票多現金少㗎啦，你開到幾多要搬幾多貨咪幾多貨囉！」擺明要錢唔要貨，聽到都心寒！至於現有做開孖展嘅客戶仲慘，以前仲話可以畀高息一直call住孖展拖字訣，依家凸一萬大元都要幫佢平倉，生意自然少咗好多；莊家方面，好多市值管理嘅倉都係「一開二、一開三」，意思即係話有100萬元可以買多200萬元或300萬元的貨，依家就算Day Trade做都係唔容易。孖展新規生效後，無論係抵押融資生意、市值管理、正常客戶買賣生意會都一蹶不振，而且禍害深遠難以恢復。
本人沒持有上述股份。【黑體】
Facebook專頁：財技戲法
