P5 財技戲法
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：創業板股票少碰為妙
國慶假期水盡鵝飛（其實水淨鵝飛都係正字，其他「水靜」、「河飛」都係錯），加上孖展新規（即《證券保證金融資活動指引》）生效後，創業板公司股票基本大大部分有融資嘅都要搬倉，呢兩周筆者已收到不少人詢問「八仔」按貨借錢，其實佢哋都問得幾有技巧的，會加一兩隻主板股票在其中，等個感覺良好一啲，實情係一問貨值分別比例係幾多就露餡；就好比古時啲青樓啲女係選擇多，但良莠不齊，點都整一兩件紅牌喺度，但客人永遠都book唔到，咁就蒙混過關。
筆者一問之下，原來成個倉三隻股票市值有幾千萬元，但其中兩隻「八仔」已佔去幾千萬元，只有幾十萬元係主板股票，咁你想我點借呢？我都唔好意思開口得罪金主啦。老老實實，做我哋呢行收到呢啲借錢刁返來，都心裡有數，問嗰個一定無咁好死淨係搵你一個，肯定係漁翁撒網式咁問，同埋好多時都係周街都搵唔到水魚，最後先搵到你。
首先我哋有都有兩樣嘢把關，第一要問佢攞幾多貨過來，支支吾吾以對的就係咁先；第二就係睇下隻嘢係咪最近股價踢高咗，講真隻股票做兩成LTV（Loan to Value）畀佢本身係1,000萬元，唔通佢一個月內股價踢高10倍金主又要借成1億錢畀佢咩？筆者記得都唔係好耐之前大概係今年五月中時，就係隻中國稀土（00769）踢高差唔多兩倍時搵人打電話來問借錢。
所以如果唔係背後老闆有財力有實力，筆者都都盡量唔好掂創業板股票，因為第一係買完難套現，好多散戶點解唔買磚頭要買股票，大部分主因當然係唔夠錢啦，但好多人都係貪股票變現能力高，依家創業板好多公司都無錢去維穩股價，除非閣下想做善長人翁啦；第二就係買完都坐得唔舒服，正如筆者上文講到依家好多創業板公司被逼搬倉，而同一時間又無一間行肯接呢個炸彈，咁問題一日未解決遅早都會爆，到時股價暴跌就欲哭無淚。今時今日香港局勢緊張，加上中美貿易問題個股票市場可以話係腹背受敵，睇好會有「晴天」嘅樂觀者就會分段撈底，買入每年或每季穩定派息嘅大藍籌；如果唔睇好香港前景嘅悲觀一族，當年香港經歷沙士、金融海嘯時都一樣唔睇好，所以都無咩好建議。其實筆者一直留意緊一間酒店公司，淨資產極高、現金多、又不斷回購公司股份，老闆持貨接近七成又係有份量嘅富豪，筆者先賣個關子下期或下下期再同大家研究研究。
【權益披露：本人沒持有上述股份】
Facebook專頁：財技戲法
