P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：做餐飲生意 系統最重要
呢幾個月都有好多食肆已經結業或者將會結業，有好多仲係做得住嘅不外乎係上市公司集團，或者係本身自己買落嘅舖位，因為喺香港呢個彈丸之地，淨係交租都已經無咗一大截，扣埋人工、燈油火蠟、食物成本後，純利有百分之十幾已經係偷笑，所以做飲食嘅生意幾時都係咁難做。難做唔代表所有人一定做唔到，點解會有食肆開完一間又一間？除咗本身啲出品好食之餘，最重要嘅係一套完善嘅餐飲系統！大家有無發覺好多用iPad落單嘅餐廳好多都做得好好？一套呢啲系統都要數萬至十萬計，咪睇個成本好似好貴，但其實慳咗好多人手；起碼唔洗人手落單先，就算係錯都係個客落錯Order，有咩都有根有據，同埋「電腦化」之後個客食咩廚房肯定一目了然。因為假設一間餐廳請三至四個樓面，未必個個寫嘅字都一定睇得明，有時「潦」得滯廚房又估估下浪費唔少時間。落單呢Part搞掂咗，樓面只要負責出菜同埋執枱、抹枱，因為生意做得夠唔夠多其中一個決定性因素就係翻枱夠快，出面有Walk-in客排隊等時只要翻枱夠快就可以做多幾台客。
大家有無發現食日式放題時都當訂位只有兩至三個時段？因為Set好咗個時段就知道分幾多張枱畀Booking客，一間成功嘅餐廳通常都係Booking客佔三分之二，Walk-in客佔三分之一，點都要留番啲位畀Walk-in客，咁樣先會不斷吸新客（當然Booking同Walk-in都有分新舊客人），個客次次Walk-in來到都無位就會以後都唔嚟，同埋訂位預多少少係因為不時會有放飛機情況出現，就算有人甩底都可以後補畀Walk-in客，好多餐廳都要用埋一個網上Openrice訂位系統，變相又煩少多一樣嘢。
今期心水利福國際（01212），現價實在太平。
筆者沒持有以上股份。
Facebook專頁：財技戲法
