P5 財技戲法【股價圖：中國華星（00485）】
【加贊助商至12月31日瑞邦證券】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：中國華星抵博
泰昇集團（00687）升得幾靚仔，以今日收市價1.53元計加埋之前派的股息已有1.74元，新主易手後應該會慢慢將股價反映價值，初步起碼衝穿2元，之後如入無人之景。
筆者得閒都會上聯交所網頁「碌下」啲上市公告，咁啱睇到隻中國華星（00485）以750萬元出售豐威控股有限公司全部股權，本身公司之前叫實華發展、升岡國際，依家公司主要從事設計及銷售電子產品、水電站運營及管理、物業投資、物業開發及證券買賣，今次出售目標公司從事電子產品設計及銷售以及證券買賣。值得留意嘅係個買方叫靚蝦王控股有限公司，雖然筆者唔賭馬，但靚蝦王個朵實在太響，基金上無人唔知呢個名係一隻馬王嘅名，呢隻馬係1999年至2002年連續三年成為香港馬迷投票選出最受歡迎嘅馬匹，佢亦係第一隻喺海外贏到一級賽嘅香港馬，重點係呢隻馬咁啱個馬主就係以前升岡國際主席劉鍚康同佢夫人，依家連收購方間公司都改埋靚蝦王個名，其實檔嘢都係賣返畀自己。資料顯示劉錫康及其聯繫人於合共32,891,933股股份中擁有權益，佔已發行股數4,256,797,561股中7.72%，之前2014年做過一次全購又係用靚蝦王控股同一間公司。
喺呢單出售之前，公司在9月底出過一份公告，內容係以2,000萬元收購一間喺中國成立嘅有限公司，目標公司主要從事物業開發、物業銷售、物業租賃、物業諮詢、物業管理同埋泊車服務，佢主要資產為土地便出權，幅土地位於遼寧省本溪市桓仁縣，而上一手收購升岡國際的老闆同就係遼寧實華房地產老闆，既然都賣咗，舊主仲保留7.72%做乜呢？情況就有如早兩年前三盛控股（02183）咁，全購後舊主都保留一定數量股份揸手，之後公司股價都以數倍飛升，照睇中國華星都唔係唔可能架，現市值只有1.4億元，淨係NAV都有3.8億元，兩個字：抵博！
下期預告筆者都推介一間飲食板塊的上市公司，主要從事食肆及餅店營運，提供餐飲服務，以及生產、銷售、分銷與食肆營運及禽畜養殖營運有關的食品，依家13億元市值同時現金已佔去5.6億元，資產有16億幾，檔生意每年都穩穩陣陣賺緊錢，以現價計個股息率非常吸引，每年足足有8至9%！
【權益披露：本人沒持有上述股份】
Facebook專頁：財技戲法
