P5 財技戲法【股價圖：BC科技集團（00863）】
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：高息飲食板塊股（一）
受香港局勢影響，今日大市下跌超過800點，恒指一度失守27,000點關口，睇嚟呢場社會運動有排都未完，不過筆者公司大老闆幾個月前搵過高人算過，今年11月9至12月9日係最激烈的時期，過後就會慢慢好轉，暫時準到無朋友，但筆者希望事件盡快解決，外憂都未完又有內患真係好難搞。
話說筆者推介的區塊鏈第一股BC科技集團（00863）氣勢如虹，今日大市跌800點都可以頂住個價升1.11%，累積升幅近一個月已有超過六成。以前筆者就會好似依家好多行家咁，中咗啲咩就認屎認屁CAP晒圖又貼IG貼Facebook慌死人唔知咁，但寫文日子耐咗就懶得去講。讀者有心實會留意到，就算留意唔到咪由佢囉，反正個戶口又唔會多咗錢。值得留意嘅係通常係咁認叻的，都係有開股票班搵食，問心我一周出兩篇文，假設中一兩隻十幾廿個%，呢啲咁嘅勝率貼出來都面紅，更何況依家呢個市況真係搵到錢先係最重要，貼中乾升沽唔到貨又係嘥氣。
上期預告筆者會推介一間飲食板塊的上市公司，稻香控股（00573）主要從事食肆及餅店營運，提供餐飲服務以及生產、銷售、分銷與食肆營運及禽畜養殖營運有關的食品，當然唔係屬於嚴重染「藍」店舖，如果唔係就「All爛」喇。公司上半年業績有增長，純利比去年多44%，錢賺多咗之餘派息相對比同行其他公司穩定（筆者講緊嘅穩定係以最近十年計），以現價1.31元計每年有8%股息係相當吸引，市值現時只有13.32億而淨資產有16.5億元，現金比去年多了三千幾萬，財務狀況非常穩健。另一個亮點係大股東鍾偉平在本年度6月17日開始至今進行25次增持公司股份，正所謂講多無謂，行動最實際！任佢點做廣告去吹間公司幾好，都唔夠自己老闆出錢增持咁有正面作用，一間公司最清楚或者最熟悉公司盤數或者未來前景一定係老闆或者大股東本人，過往好多例子都係大股東增持後十之八九之後都係會有一定升幅，而且現時股價正處於近五年低位，筆者相信呢啲位撈底去收息無死錯人嘅。
下一期筆者會推另一隻又係經營酒樓嘅飲食板塊股，呢間公司屬比較極端例子，派息唔算好穩定但高息，市值細兼且有厚厚資產兼且零負債。
Facebook專頁：財技戲法
【權益披露：本人沒持有上述股份】
