P5 財技戲法
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：高息飲食板塊股（二）
相信過去呢一個星期大家都好唔方便，筆者都係一樣，交通堵塞加上接觸了催淚煙身體皮膚痕癢無比，搞到第二個平台都交唔到稿，實在抱歉。上周日（11月17日）香港局勢亂到九彩，反而恒指升市，其實筆者講過好多次，大部分公司已經跌到超值價，根本跌無可跌，真正問題只係個市場缺錢。因為有好多公司連市值管理都唔做，就好似筆者推介過又跌到慘不忍睹的（01682）杭品生活科技咁，股權分布係非常集中，基本上係無成交一直乾跌，左右買沽兩邊擺的盤都唔過兩萬港元，仲要成日無成交，買咗想沽又難，因為「左邊」價太遠，所以而家筆者都係建議大家買一啲大成交，或者係高息有值博率嘅股票。
上期又預告筆者會推介另一間飲食板塊的上市公司富臨集團控股（01443）。富臨集團主要於香港從事餐館營運，集團在香港共擁有73間餐館，分別為29間「富臨」系列品牌、11間「陶源」系列品牌及33間「富臨概念」系列餐館，及於內地擁有4間餐館。集團餐廳多元化，有主要供應韓國菜的「炑八韓烤」及「炑八Taste」，還有其他火鍋概念系列「富城火鍋海鮮酒家」、「正冬火鍋料理」、「正冬魚塘公」、「四季文昌」等。去年「富臨概念」開創多個餐飲新品牌，包括以優質柞木炭取代一般鐵板燒的高級韓式燒烤餐廳「柞木炭家」，目前已於銅鑼灣及旺角開店；本地冰室快餐路線的「加多樂餐廳」及「龍門冰室」，分別落戶新蒲崗，以及屯門和香港仔；以優質咖啡及特色輕食作招倈的「COTI」，目前已於觀塘、石門及荃灣開店，廣受鄰近辦公室顧客歡迎。
去年公司全年賺2,549萬元，但今年公司在9月尾發盈警，預計半年業績錄得除稅前虧損，主要原因都係受社會運動氣氛影響，周圍都係有機會危險，就算一般市民出來消費，都會怕離開時交通唔方便，而返唔到家。不過，筆者推介呢間公司都唔係因為佢檔生意做成點，主要係市值細同埋零負債，公司持有現金4.969億元，除返開以發行股份13億股計，每股現金價值高達0.3822元，計埋公司有其他持有物業資產淨值有9.38億元，現價0.265元市值只有區區3.45億元，就當佢今年蝕錢無息派都實在係超值。
Facebook專頁：財技戲法
【權益披露：本人沒持有上述股份】
