P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：娛樂板塊新星
筆者過去的專欄寫過唔少娛樂、電影板塊的上市公司，有華誼騰訊娛樂（00419）、歡喜傳媒（01003）、天馬影視（01326）、邵氏兄弟（00953），全部股價都係不斷往「南」走，加上無成交又無「Project」做，一年都唔出多幾份吸引而有足夠亮點嘅上市公告，想炒起真係難上加難。
上周二（11月19日）筆者「夜觀」聯交所公告，喺云云娛樂板塊之中，發現一顆特別閃耀嘅新星太陽娛樂集團（08082），話說呢間公司前身叫仁智國際，從事殯葬相關業務，經由新一代賭王周焯華先生入主後改名太陽娛樂集團數月以來一直未見有任何動作，主要原因筆者認為係受最近社會運動影響，暫時避一避乏人問津嘅市況。但世間沒有無緣無故的愛，也沒有無緣無故的恨，相信老闆都唔會求其買隻殼返來，筆者一直深信未來一定係會有資產、項目注入，絕對唔會乜都唔做。上週筆者留意到公司開始有所動作，因為近日公司出了一份重磅勁爆公告：以一般授權發行新股及有關訂立合作協議之內幕消息，引證公司真係準備食大茶飯。
呢份公告有幾大亮點由筆者以顯淺文字簡單講下，首先呢份合作協議由太陽娛樂集團全資公司光尚文化與顧問Tse Kar Ho Simon訂立。公司同意合作期每一季向顧問支付六萬港元作顧問費用，另外公司以一般授權向顧問或其指定公司發行3,300萬股新股，新股佔以發行股份2.71%及擴大股本2.64%。
顧問會促使有關藝人向光尚文化提供協議內容有關嘅演唱會，同埋相關娛樂節目。顧問承諾呢份戰略協議為光尚文化保證至少3,000萬港元的溢利，翻查網上現有資料顯示認購人謝嘉豪先生（顧問）原來來頭不小，本身為陸慶娛樂集團控股（08052）的獨立非執行董事，佢持有92.5%股權的寶輝娛樂，就係同一時間呢間公司舉辦過的演唱會有幾位猛料級藝人巨星，分別有陳奕迅先生、張學友先生和周杰倫先生，單單係呢幾位巨星開演唱會嘅吸金能力，喺華人娛樂圈嚟講都可以佔去頭幾位；另一個超級亮點就係以戰略合作協議日期股份收市價0.67元，發行3,300萬股實數約為2,210萬元，連同合作期3年支付總數72萬元及保證溢利3,000萬計算，每股理論價值為0.91元（公告無講明係呢個價，但大家都明白謝生變相入股價係0.91元），確實比現價高出23.9%，可見認購人對公司前景絕對充滿信心。
筆者建議不超過0.8元可以大膽加碼追入，靜候公司股價飛升後下一輪部署。
本人沒持有以上股份。
Facebook專頁：財技戲法
