P5 財技戲法【股價圖：太陽娛樂集團（08082）】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：太陽娛樂加滿油準備開車
上周有多隻股票被洗倉，包括有雅高控股（03313）、卡森國際（00496），點解後者可以反彈咁多，而雅高仲要繼續落呢？其實公司早前出嘅公告都可以看出端倪，話說在崩盤前一周左右公司出了一份一般授權配股的諒解備忘錄（MOU），每股認購價為9.34元，認購方係中國註冊公司，主要從事礦產勘探、礦山開發以及提供勘探技術及諮詢服務，大股東為隸屬於國務院國有資產監督委員會的北京礦產地質研究院。大家以後見到類似公告就要醒水喇，理得佢係咪國務院，總之用得一般授權配得股就唔洗出MOU，咁唔肯定就一定有鬼。
早幾個月前筆者在文章寫過太陽娛樂集團（08082），爆了一兩支小陽燭至0.8元左右之後一直無任何消息，不過上周公司曝光率都多，攞咗信報財經新聞頒發的2019年上市公司卓越大獎，創業板公司只有兩間得獎。另外出一份振奮人心嘅一般授權配股，同埋訂立戰略合作協議嘅內幕消息公告，由太陽娛樂集團全資公司光尚文化同顧問謝嘉豪先生訂立，有效期為三年。呢三年公司每季支付顧問費用6萬元，同時以一般授權向謝嘉豪先生發行3,300萬股新股，根據合作協議對方保證溢利不少於3,000萬元。呢份公告要從多方面解讀，橫睇掂睇點都係謝生唔著數。
網上現有資料顯示認購人謝嘉豪先生（顧問），為陸慶娛樂（08052）的獨立非執行董事，又係寶輝娛樂老闆，呢間公司舉辦過的演唱會有幾位猛料級藝人巨星，分別有陳奕迅先生、張學友先生和周杰倫先生。能夠叫得郁呢幾位巨星助陣搞演唱會，相信喺娛樂圈一定有番咁上下地位，調返轉去諗，你估謝生係傻㗎咩，無啦啦送3,000萬溢利畀你，就咁除番3,300萬股要0.91元，講真嗰三年每季6萬顧問費72萬元對於謝生嚟講，應該都係散紙，問心去「跳舞」都唔會為咗個果盤啦，咁嘅條件都肯，筆者唯一諗到嘅係謝生睇好公司未來股價走勢，只要股價衝穿一蚊就已經贏錢，不過大家認為謝生會唔會淨係睇一蚊？仲有一點相信好多人睇完份公告都無留意，就係一般授權今次可以發行243,559,601股，即係公司仲有210,559,601股Quota可以發行，謝生認購以擴大以發行股份計2.64%，之後會唔會再增持或者有新股東加入，呢度公司埋咗條小伏線。
筆者建議現價0.68元可以入定貨底，留意有成交踢上就加碼追入，等公司股價下一輪部署。
【權益披露：本人沒持有上述股份】
Facebook專頁：財技戲法
