P5 財技戲法【股價圖：同得仕（集團）（00518）】
作者：Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：同得仕賣殼已是板上釘釘（二）
唔經唔覺筆者在個半月前推介的贛鋒鋰業已由13.66元上升到17.6元收市，最高曾經到過18.52元，升幅高達35.57%，喺呢個市況個半月有呢個回報都算係咁，我唔知讀者會點買財經專欄推介嘅股票，但筆者認為概念同足球投注一樣，筆者會在討論區留連，專門揀選一些命中率極高的高手然後平注投注，發現拉上補下都會有回報，當然「買波」或者買股票最後都要加上自己分析，如果唔係輸得不明不白就唔抵喇。
日前筆者睇到同得仕（集團）（00518）出了一份上市公告，而早幾個月前筆者一直有跟進開呢隻股票，所以繼續update下大家資料。呢間公司1988年12月15日上市，主要從事成衣製造及銷售，算係老牌上市公司。之前出售過同得仕大厦，筆者開始留意覺得佢可能會賣殼，始終咁核心嘅大廈都賣走、加上生意難做，都無咩好留戀吧。公司去年都不斷計劃出售主體資產業務昇陽（海外）主要做零售業務、物業及投資控股，另外呢間公司持有深圳百多爾100%股權，佢嘅零售業務涉及同得仕自家品牌betu服飾產品內部設計同埋零售銷售，間公司在浙江杭州、深圳都持有物業（深圳同得仕大廈）；另外公司出售了同得仕貿易，呢間公司主要做貿易、製造業務、物業控股，同時擁有中山同得仕100%股權，就係呢個出售上年叫停了。
動作多 等炒上
今年公司又以5,241萬元出售同得仕（杭州），其中最大的資產就係一個電子商務園嘅物業。剛剛早前公司又有公告以1,080萬元出售泰國物業，完成出售同得仕（杭州）後公司更擬將出售事項其中所得淨額的500萬元用於分派特別股息。上周昇陽（海外）捲土重來再次出售，潛在買方仲要出1,000萬人民幣誠意金𠻹，但最後又係過晒協議期不了了之，只係公告講明雖然終止咗個MOU，但係公司同潛在買方就可能出售事項嘅商業磋商仍在進行中。日前公司又出公告賣東莞市清溪鎮漁梁圍村嘅資產，包括佔地17,041平方米之工業用地使用權，使用年期到2055年3月31日才屆滿；另外有20,473平方米的宿舍大樓及廠房，總代價為7,050萬人民幣，出售後公司將派發788萬元的特別息（約0.017元），現價0.5元計都有3.4%。呢次賣地賣廠都有啲鬼鬼哋，目標資產在9月底時帳面淨值只有4,593萬元，短短兩個月就估值多2,432萬元（扣除800萬元稅項後），買方仲要係一間風馬牛不及從事軟件及信息技術服務嘅公司，現時同得仕市值2.32億元，出售目標資產後公司現金已有2億元，期待公司嚟緊會大變身。
【權益披露：本人沒持有上述股份】
Facebook專頁：財技戲法
