P2 財技掩眼法【股價圖：有才天下獵聘（06100）】
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：半新股國內龍頭獵頭公司
有朋友問筆者美國打伊朗係咪唔好買股票，筆者答佢咁你今日食唔食飯？其實件事發生之後個大市都唔係跌好多，最多都係跌幾百點，上周五（1月10日）成交額仲要有逾一千億元，香港股市都已經慢慢回穩，由低由上番來接近29,000點，唔通等破30,000點先買貨咩？到30,000點時又會覺得升多咗風險又高咗，正如你生咗個女，梗係趁後生畀佢拍下拖吸收下愛情經驗值，唔通要搞到人老珠黃先畀啲小鮮肉欺騙咗個純真嘅心咩？經濟有周期，股市一樣都有，好多時發生咗啲大鑊嘢或者經濟不景氣，大家就唔敢買貨唔敢投資，每次都係話今次唔同呀今次點點點，大家回想下香港03年「沙士」時都會覺得今次死好多人，香港變咗死城咁，同當年97金融風暴唔同。到08年金融海嘯時又話今次係海嘯唔係風暴，海嘯勁過風暴之類。依家香港社會運動帶來嘅衝擊，大家點解唔可以諗下係汰弱留強嚟一次大洗牌呢？雨過一定係天晴，個市餓得耐，總會有班人因為長期無飯開去做嘢，依家周街都係靚股票就應該每月儲啲，等待收成時機。
有才天下獵聘（06100）筆者幾鍾意，話晒係國內龍頭獵頭公司，呢間公司去年6月29日上市，當時招股價33元，公司經營中國最大的專注於中高端人才的線上人才服務平台。憑藉對人才的深刻理解，集團已打造一個為個人及企業用戶提供多種人才服務的平台。以現價14.26元計已比招股價跌去超過一半市值，間公司有成30億存款及現金加上剛剛出了一份正面盈利預告，全年業績比去年有91.4%至111.4%增長，所以下周五收市升幾個百分點都係合理，唔多唔少都有春江小鴨子進場。
本人沒持有上述股份。
Facebook專頁：財技戲法
