P5 財技戲法【股價圖：中國科培（01890）】
【走贊助商瑞邦證券】
Sammy畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的障眼法。
=====================
題目：過年後股市逐步向好
上一篇文章提到電影娛樂板塊斧底抽薪後會越來越好，筆者之前推介過嘅太陽娛樂集團（08082）都已經完成配股，每股發行價0.67元，估計過埋農曆新年應該會慢慢見真章，無理由搞咁前期功夫咩都唔做，現價0.65元都係抵博到爛。雖然筆者唔知會有咩動作，但不外乎都係放啲有營利能力嘅項目入去，將條數做得靚靚仔仔，淨係業績發盈喜都已經夠晒炒作話題。
因為就快過年關係，好多行家都係做埋手頭上幾單IPO，或者有借錢就Call定孖展做好風險控制，如果過埋年都無咩大跌，或者洗倉情況，好多公司都有可能嚟個大反彈，大細價股都極有可能嚟番個小陽春。原因無他，大家睇下近幾日大市成交金額都過一千億元，點數計都一嘢衝穿29,000點，比起去年年中每日得五、六百億成交金額嚟講，明顯係有資金流入港股市場，有錢流入必有一炒，所以香港新年後嘅股市筆者係偏向睇好嘅。
中國科培擴大版圖【黑，小題】
中型市值又穩穩陣陣嘅筆者幾鍾意之前寫過嘅教育股中國科培（01890），現價4.06元，市值有81.23億元，已經係深港通名單長期有北水支持，除咗筆者上次講過幾個月之前，公司自願公布旗下學校在校人數增加的好消息之外，公司剛剛出了公告以14.5億元人民幣收購哈爾濱一所學校分三期支付，首期4.5億元、第二期付7億元及尾數3億元，最遲今年9月中完成最後一期支付。公告提到公司董事相信，股權轉讓協議標誌著本集團自去年上市起首次嘗試拓展學校網絡及增加市場滲透率的里程碑。董事認為，憑藉收購事項，本集團將有能力進軍哈爾濱，哈爾濱是本集團另一個具有戰略意義的重要位置。
此外，收購事項後，本集團的學生總數將進一步增加，其盈利能力及滲透率將進一步增強。完成收購後公司在中國運營三間學校，分別有廣東理工學院、肇慶學校及哈爾濱學校，不排除收購後公司會有集資需要，但經營學校同做飲食一樣，最緊要係有生錢流轉，定期有現金流同埋預測到大概未來收益多少，每日成交額有千幾萬，呢啲穩紮穩打買完又唔會輸得去邊，筆者看好佢市值有望衝擊100億元。
【權益披露：本人沒持有以上股份】
Facebook 專頁：財技戲法
