P32 招財密碼
作者：潘啟才（Phemey），測量師出身，試過輕輕鬆鬆年薪過百萬，亦試過胼手胝足地創業。後來發覺幫人做成生意最過癮，成功拉攏買賣雙方便穩袋幾百萬，至此「通天經紀」之名便不脛而走。眼光準、膽量大兼且身體力行，搞炒股投資班大賺一筆之餘，亦計劃大搞創業班，矢言教授云云打工仔、待業青年、大學生無本生利，財來八方的本事。
===========================
題目：學睇股票有方法
我在2001年，在香港中文大學讀了一個財務係碩士課程，其中一科是financial management，該課目所學到的知識，對於做好對股票的基本分析，非常有用，但由於我本人無論做人做事，都非常心急，成日都想一朝發達，所以即使是做基本分析，都唔會去分析一啲正派嘅股票，只會用來分析一啲唔正經嘅股票，其結果可想而知，通常都係輸錢收場。我也有接觸及學過技術分析，但自問如果有一套方法，連教我的老師，由他去操作的基金，其表現差過指數不特止，還要在一年內，以輸幾十個百分點收場，這種方法，如果由我去應用，只會表現更差，所以技術分析呢樣嘢，真係唔係好啱我。
最後，我終於通過《炒股密碼》一書，進入了財技分析這個世界，這種方法去睇股票，對我的吸引力有以下幾點，首先這種研究分析方法夠簡單，相對基本分析，需要睇幾年數，淨係呢樣嘢，對於我呢類周身癮嘅人，根本就花唔起日日以鐘頭計嘅研究時間，而財技分析法個種好模糊、好大概、好省時概分析法就好適合我。
此外，財技分析法亦有其宏觀性，亦幾holistic，基本分析只睇數字，睇盤生意得唔得，行業前景得唔得，好少會考慮公司管理層有冇變動，大股東近期有冇將啲股份由持實股，改為放進中央結算系統等。由於財技分析法假設了人的與生俱來的貪婪性，並且一定會把自己的利益放到最前，所以一些企業行動、收購合併、人事變動，尤其是董事局成員的變動，比公司的營運情況，賺蝕情況更加重要，況且從過往一段不短時間，及至今天，一間中小型上市公司，在香港經營的困難程度，其實比一家私人公司更甚，主要因為單單為滿足上公司的合規要求，一年小者使多幾百萬，多者要過千萬，而這些洗費，正正就是由利潤貢獻出來的。因此，對於中小型上市公司的分析，用基本分析去分析，好多時根本係浪費時間，因為以中小型上市公司的規模，在自身行業的影響力，大部分情況下，都不會大，所以其業績的可預測性是很低的。
財技知識的重要性
而更要的是，由於我覺得財技分析法這門學問的知識，不單止可令我成為股票的投機者及投資者，更令我可以晉身成為老師，開班教授這門終生受用的知識，就算學生學完這個知識，不買賣財技股，但這些財技知識，由於識嘅人仍然唔多（我開車經常聽財經節目主持人及財經演員講股票，好多這類人，做咗十多廿十年這一行，但對於一些基本財技知識，如供合拆配，好多時仍然一頭霧水。）學咗之後，與其他行內人一比，你會覺得早咗幾班。
然而，最重要的是，有了財技知識，加上我做了上市公司主席之後，睇股票又多了一個角度，就是深入地知道董事局的重要性性，亦知道究竟獨立非執董的重要性及獨立性。此外，董事局與大股東的關係的重要性，在股東周年大會，如果大股東同董事局關係不好，隨時可以出事，這些繁瑣，散戶不會留意的事，有時就因為這些小事，可能會對公司股價，短時期內，皆生了巨大影響。
