P2 財技掩眼法
作者：Sammy，畢業於英國赫德斯菲爾德大學工商管理學系。曾為職業魔術師及婚禮司儀，現以財技角度切入分析股票，破解莊家的掩眼法。
Facebook專頁：財技戲法
=======================
題目：港股好番要搞多一年半載
之前筆者講過過完新年股票市場應該會逐漸轉好，睇嚟呢句筆者要收番。香港股市呢幾年真係多災多難，先係打擊買賣殼股，然後到中美貿易戰，再有社會運動，諗住都慢慢回復平靜再爆一單武漢肺炎。十七年前「沙士」足足半年左右先搞掂，今次武漢肺炎影響比沙士時都有過之而無不及。
就睇香港政府遲遲都唔封關已經好大鑊，因為有好多武漢帶毒者一早在封城前已經逃離出市，所以疫情擴散得好快，受感染者仲有潛伏期可能會無任何徵狀，唔發燒就畀佢入關，無疑令都香港變成高危區，幸好暫時香港確診武漢肺炎的個案只有十數單，如果數字上再有大規模擴大的話，相信未來繼續會有唔少國家禁止香港人入境。
因為去年香港社會運動好多飲食業、零售公司都結束營業或者係捱打狀態，去年社會運動影響都無肺炎咁嚴重，因為香港人會開facebook睇直播，邊區「搞事」、堵路就唔去邊區，直接跨區消費；但肺炎係無直播的，唔會有個app話你知邊個中咗招，所以依家香港市道可以話比去年差，去街市買餸已經知貴咗好多，唔止係街市，甚至賣成百蚊斤叉燒都有，當全城都減少出街又唔消費、個個掛住瘋搶口罩，試問經濟點會好，經濟唔好個股市又點會好？
話雖如此，但香港股市都係無奇不有，就好似隻中國醫療集團（08225）咁，出完公告話公司旗下研究新型冠狀病毒發現一隻產品製劑，對病毒有較好抑制作用，個股價就由0.075元兩三日時間踢高到3.91元，其實佢只係話有較好抑制作用，唔代表可以令患者全面康復，臨床測試乜都未做，一隻疫苗要由研究到成功再推出市面最快都要一年半載啦，不過無計，股票從來都係炒預期，下次大家見到有呢啲瘋炒股不妨跟入，但不出三日就要醒水走人。
【權益披露：本人沒持有上述股份】
Facebook專頁：財技戲法
